Aumenta a espera media para as intervencións máis urxentes en Galicia: 19'4 días de agarda

No 2017 estaba arredor dos 18 días. Porén, baixa o tempo de agarda para operacións de prioridade 2, e o Sergas resalta que a media global é a "máis baixa" da historia en Galicia.

Por E.P. | SANTIAGO DE COMPOSTELA | 24/01/2019 | Actualizada ás 13:56

Comparte esta noticia

A espera media para intervencións máis urxentes en Galicia -prioridade 1- incrementouse lixeiramente ata os 19,4 días a 31 de decembro de 2018. Isto supón unha suba de algo máis de 24 horas, respecto dos 18,1 días de espera media no  mesmo período de 2017, segundo os datos presentados este xoves pola Consellería de Sanidade.

Cirurxía cerebral nun quirófano
Cirurxía cerebral nun quirófano | Fonte: Europa Press

En rolda de prensa, o xerente do Sergas, Antonio Fernández-Campa, destacou que, a pesar dese incremento, mantense por baixo do obxectivo fixado de menos de 30 días. Pola súa banda, o tempo medio de espera en prioridade 2 reduciuse desde os 65,5 días a finais de 2017 a 63,7 ao termo de 2018, matizou.

En canto ao tempo medio de espera cirúrxica global, o xerente do Sergas fixo fincapé en que se sitúa en 61,6 días, 4,8 menos que en 2017, o que se traduce na "cifra máis baixa de toda a serie histórica de Galicia".

Ademais, resaltou as 43.550 persoas que se beneficiaron da garantía establecida coa entrada en vigor en xaneiro de 2018 do decreto de tempos máximos para 108 tipos de patoloxías, 26 probas diagnósticas ou terapéuticas e sete vías rápidas. Respecto diso, asegurou que "todos" os casos obtiveron resposta dentro da rede pública do Sergas e "ningún" tivo que ser derivado a centros concertados.

En canto ás consultas, o xerente do Sergas apuntou que o tempo medio de espera para as primeiras mantense por baixo dos 50 días ao situarse en 44,8 días, 1,8 menos respecto de decembro de 2017, o que implica tamén o dato "máis baixo" da última década.

Sobre vías rápidas incidiu en que 16.409 pacientes se beneficiaron destes procedementos cun tempo medio de resposta de 7,1 días a decembro de 2018. Mentres, o tempo medio para as probas diagnósticas terminou o ano pasado en 69,8 días, sete menos que en 2017.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta