Un instituto de Monforte, entre 15 en España nun proxecto para promover vocacións tecnolóxicas no eido da enerxía

O instituto monfortino IES A Pinguela é un dos 15 centros de toda España que participan no I Certame Tecnolóxico Efigy, unha iniciativa da Fundación Naturgy que busca fomentar as vocacións tecnolóxicas no campo da enerxía.

Un total de 59 grupos de estudantes de 3º e 4º de ESO de todo o Estado participan na primeira edición da iniciativa, que conta co aval da Fundación Española para la Ciencia y la Tecnología(Fecyt).

O programa, segundo destaca a Fundación Naturgy, quere "espertar a vocación dos estudantes por temas enerxéticos, tecnolóxicos e ambientais", así como "promover unha educación en usos sustentables e responsables da enerxía".

"O que queremos con Efigy é situar o certame como unha convocatoria anual que os centros educativos teñan como referencia e animar a que a savia nova contribúa coas súas propostas a mellorar o noso planeta, mediante a eficiencia enerxética, un dos selos de identidade da nosa Fundación", afirmou o director da Fundación Naturgy, Martí Solá.

Os gañadores coñeceranse no mes de maio despois dunha fase de defensa pública dos proxectos ante un xurado profesional, que se celebrará en Madrid.