O Imserso abre o 1 de xullo o prazo de novas solicitudes para a tempada de viaxes 2025/2026

O martes 1 de xullo abrirase o prazo para presentar novas solicitudes de participación no Programa de Turismo Social do Imserso 2025/2026, que se prolongará ata o 23 de xullo, ambos días incluídos. O proceso diríxese ás persoas que non participaron en campañas anteriores e desexen acceder por primeira vez ao programa.

No caso de usuarios acreditados doutras tempadas, non será necesario volver cubrir a solicitude, salvo que queiran modificar datos persoais ou preferencias de destino. Nese caso, deberán devolver o formulario recibido debidamente actualizado dentro do mesmo prazo.

O Imserso recomenda realizar a presentación telemática a través da súa sede electrónica. Alí poderá descargarse tamén o modelo oficial de solicitude para cubrir e enviar.

PREZOS, DESCONTOS E RESERVAS

Unha das principais novidades desta edición será a introdución dunha tarifa plana de 50 euros para persoas con pensións máis baixas, con 7.447 prazas reservadas a este prezo.

O importe total dunha viaxe dependerá do destino e da duración, e nas viaxes en tempada alta (fóra de outubro, maio e xuño na Península e Baleares, e decembro, xaneiro e febreiro nas Canarias), aplicarase un incremento de 100 euros respecto aos prezos de tempada baixa.

A reserva dunha praza implicará o pago dunha cantidade fixa, que non poderá superar o 20% do prezo total da viaxe. O resto deberá aboarse con 45 días de antelación ao comezo da actividade.

NOVIDADES: VIAXES CON ANIMAIS E MÁIS DESTINOS

Este ano, por primeira vez, o Imserso permitirá a participación de animais de compañía nalgunhas das súas propostas. Estableceranse prazas específicas para viaxes ás costas peninsulares e insulares que admitan mascotas, sempre segundo os criterios normativos de convivencia e coidado.

O programa mantén a súa estrutura en tres lotes principais:

• Costa peninsular: estancias de 8 e 10 días en Cataluña, Andalucía, Rexión de Murcia e Comunidade Valenciana.

• Costa insular: estancias tamén de 8 e 10 días nas Illas Baleares e Canarias.

• Turismo de interior e cultural: viaxes de 4, 5 e 6 días en diferentes modalidades: circuítos culturais, turismo de natureza, visitas a capitais de provincia e escapadas a Ceuta e Melilla.

Todos os paquetes inclúen aloxamento en pensión completa, habitación dobre compartida, transporte de ida e volta, seguro colectivo, servizo médico no hotel e programas de animación cultural e social.