Por Europa Press / Redacción | SANTIAGO DE COMPOSTELA | 04/02/2019 | Actualizada ás 15:06
Militantes do BNG despregaron este luns no encoro de Velle, en Ourense, tres pancartas nas que se podía ler "Galiza produce", "Madrid consome" e "Tarifa galega" nun acto no que a deputada e portavoz de Industria e Enerxía do BNG, Noa Presas, reclamou a creación dunha tarifa eléctrica galega para pór fin á "pobreza enerxética" e ao "peche de empresas".
Noa Presas, que estivo acompañada polo candidato á Alcaldía de Ourense polo BNG, Luís Seara, sinalou que esta iniciativa é a "alternativa" que precisa Ourense para "dar o impulso económico" e "social" e, así, "deixar atrás a preocupante situación en termos de emprego e demografía que deixan as políticas do Partido Popular".
"Unha redución do 30 por cento nas peaxes permitiría reducir en 200 euros anuais a factura dos particulares e un abaratamento en todo o tecido industrial. Esiximos que o noso papel de produtores de enerxía, que fai que Galicia exporte máis do 35 por cento da enerxía que producimos, se converta nunha oportunidade para finalizar coa pobreza enerxética e co peche de empresas", destacou Presas.
Así mesmo, a portavoz de Industria e Enerxía do BNG subliñou que as comarcas de Ourense "son as máis castigadas polas políticas do PP e do PSOE, na Xunta e no Estado", xa que teñen "os peores índices de emprego, maior media de idade e pensións máis baixas, non só de Galicia, senón tamén do Estado".
ABARATAMENTO DO RECIBO
Pola súa banda, Luís Seara apuntou que a posta en marcha dunha tarifa eléctrica galega suporía o abaratamento do recibo da luz para as empresas da provincia e para o comercio local e de proximidade, "que está nunha situación límite e dando sinais de alerta desde hai tempo".
Así mesmo, concretou que esta medida tamén redundará de forma positiva na factura dos veciños da provincia, que teñen "as pensións máis baixas do Estado". "En definitiva, cando falamos de soberanía, falamos de ser donos dos nosos recursos, falamos das cousas para comer", concluíu.
Así as cousas, ambos os representantes esixiron ao PP, ao PSOE e ao resto de forzas do Estado, que "abandonen o seu centralismo" e "deixen de roubar o futuro", posto que unha tarifa eléctrica galega "permitirá abaratar a factura que pagan os galegos e galegas" e "será unha porta de estímulo para construír un futuro con traballo e con poboación con capacidade de crecer".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.