Vázquez Almuiña di no Parlamento que non vai dimitir e defende a súa xestión

O conselleiro de Sanidade, Jesús Vázquez Almuíña, asegurou este mércores no pleno da Cámara que non vai dimitir do seu cargo e defendeu a súa xestión da sanidade galega, que definiu como "100%" pública.  "Temos unha sanidade 100% pública, con novas infraestruturas. Non hai recortes como tampouco hai privatización", manifestou en resposta a unha interpelación formulada pola deputada do BNG Montse Prado, que instou ao conselleiro a "dimitir" ante as protestas de "miles de galegos" contra a xestión sanitaria da Xunta.

Neste sentido, Montse Prado considerou que, "cando un ten a todo o mundo en contra", "se ten un pouco de dignidade, o que debe de facer é dimitir". Ademais, advertiu da existencia dunha "onda de malestar" ante a que, segundo indicou, "non vale o relato no que o PP está instalado" e lembroulle os distintos conflitos xurdidos neste sector nos últimos tempos, como a folga dos profesionais da PAC e a dimisión de xefes de servizo de Atención Primaria da área de Vigo, entre outras cuestións.

Fronte a iso, o conselleiro manifestou que a política do Goberno galego "non ten outro obxectivo" que defender, protexer e, por suposto, mellorar a sanidade". Así, destacou que o orzamento para a sanidade supón un 40,5% do total da Xunta (un 35,7% máis que en 2008) e que a día de hoxe é de 3.985 millóns, 349 máis que no 2008 Ademais, sinalou que 38.609 profesionais traballan no Servizo Galego de Saúde (Sergas) en 2019, un 6,5% máis dos de 36.256 que había en 2008.

CAMBIOS NO MODELO

"Sabemos que temos unha boa sanidade pública pero sabemos tamén que a nosa sanidade ten que adaptarse ás novas necesidades e seguir mellorando, e estamos a traballar para mellorala, baseándonos en datos e feitos reais e, sobre todo, contando coa colaboración dos profesionais e dos pacientes". Respecto diso, afirmou que os cambios que necesita o modelo organizativo "só serán posibles desde o diálogo e o traballo colaborativo da Administración, os profesionais e a cidadanía".

Neste contexto, Almuiña referiuse a as medidas postas en marcha polo Goberno galego nos últimos meses para buscar unha mellora do sistema sanitario, como os grupos de traballo con profesionais ou a creación dunha nova modalidade contractual que, segundo indicou, permitirá "vínculos temporais máis amplos cos médicos de atención primaria".

PRAZAS MIR

O conselleiro, que tamén respondeu a outra interpelación formulada polo deputado do PSdeG Xullo Torrado sobre pediatría, lembrou que recentemente mantivo unha reunión coa ministra de Sanidade María Luisa Carcedo, na que lle reiterou a súa petición de eliminación da taxa de reposición e que se incrementasen as prazas MIR en Galicia. Así mesmo, remarcou a aposta da súa Consellería por manter o modelo de atención pediátrica especializada nos centros de saudade para os nenos galegos. Segundo afirmou, Galicia é unha das comunidades con maior taxa de cobertura pediátrica, próxima ao 90%.

"É dicir, case o 90% das prazas de pediatría en atención primaria están cubertas por especialistas. Esta porcentaxe contrasta co 58% de Castela A Mancha ou coa cobertura de Estremadura, Madrid, Canarias, Murcia ou Andalucía, entre outras, que roldan o 70%.

En fronte, o socialista Xulio Torrado instou ao conselleiro a acreditar novas prazas MIR ante o Goberno central como paso previo e imprescindible para ampliar o número de pediatras en Galicia. Ademais, acusou ao titular de Sanidade de "non facer os deberes" e impedir así que o Executivo estatal amplíe o número de prazas para Galicia.

O conselleiro de Sanidade, Jesús Vázquez Almuiña. Europa Press - Archivo