Médicos de Atención Primaria reclaman ao Sergas máis orzamento e prazas

Médicos de Atención Primaria da área sanitaria da Coruña fixeron entrega ao Sergas das firmas recollidas en 35 centros de saúde en demanda de máis orzamento e o incremento de prazas de facultativos. Esta recollida de sinaturas forma parte das actuacións levadas a cabo no marco da Coordinadora Galega de Atención Primaria para reclamar melloras.

Ramón Beiras, un dos médicos que participou na entrega de firmas, denunciou a "sobrecarga crónica" nestes centros. Sobre o escrito dirixido ao conselleiro de Sanidade, Jesús Vázquez Almuiña, explicou que demandan, entre outras cuestións, "recuperar a estrutura de xestión da Atención Primaria que, coa creación das xerencias de xestión integrada, desapareceu".

A este cambio, atribuíu parte dos "problemas organizativos" nestes centros. Ademais, reivindicou que o orzamento actual do que dispón a Atención Primaria, que, segundo dixo, chega ao 12%, se sitúe nun 15% para ilo aumentando, de forma progresiva, ata un 25%.

"Con estes anos de recortes, estamos nunha caída continua", dixo en alusión a unha "sobrecarga" que leva "listas de espera, que se acumulan".

Ademais, cuestionou o contrato estable para persoal eventual anunciado por Sanidade. Do mesmo, pediu a súa retirada e que se negocie un novo, "que realmente sexa atractivo" para os profesionais.

No seu escrito, reclaman modificar a Lei Galega de Saúde para que na estrutura de xestión da área haxa unha dirección de atención primaria do mesmo nivel que a atención hospitalaria. Tamén piden "pór fin á política de precariedade laboral", mentres mostran o seu apoio ás reivindicacións dos Puntos de Atención Continuada (PAC).