A Ruta dos Peregrinos entre Noruega e Santiago entra no Sistema de Sinalización Turística Homologada

A secretaria de Estado de Turismo, Isabel Oliver, e o secretario de Estado de Infraestruturas, Transporte e Vivenda, Pedro Saura, deron a coñecer os 120 novos destinos que se incluirán no catálogo do Sistema de Sinalización Turística Homologada (Sistho), entre eles a Ruta dos Peregrinos entre Noruega e Santiago.

En concreto, dos 120 novos destinos aprobados, 12 incluiranse directamente no catálogo ocupando a cota libre existente do acordo de 2013, e os 108 restantes incluiranse unha vez se asine o novo convenio que está en proceso de redacción.

Sobre os novos destinos, segundo informa a Delegación do Goberno, Galicia inclúe a Ruta dos Peregrinos entre Trondheim (Noruega) e Santiago de Compostela. Son 5.122 quilómetros que percorren toda Europa e pertencen á Rede EuroVélo de rutas ciclistas, que conectan e unen todo o continente.

A Secretaría de Estado de Turismo recibira case 200 peticións de novos destinos por parte das comunidades autónomas, pero só 120 cumpren todos os requisitos de calidade turística e de seguridade viaria -establecidos pola Dirección Xeral de Estradas- necesarios para ser incluídos no catálogo.