Por E.P. | SANTIAGO DE COMPOSTELA | 17/03/2019 | Actualizada ás 15:34
O director xeral de Relacións Exteriores e coa Unión Europea, Jesús Gamallo, concretou este domingo que o Instituto Galego de Promoción Económica (IGAPE), a través da Consellería de Economía, ten previsto "pór en marcha" unha ferramenta para que as pemes poidan "comprobar a súa preparación para o Brexit".
Segundo Gamallo, trátase dunha especie de "test de tensión" que permitirá "poder adaptar unha pequena ou mediana empresa ao Brexit", tanto se se fai un Brexit con acordo, como espera o titular de Relacións Exteriores, "coma se se fai un Brexit duro".
Deste xeito referíase nunha entrevista en Radio Galega recollida por Europa Press ao anuncio que realizou este venres o presidente da Xunta, Alberto Núñez Feijoo, que avanzou a intención do Executivo autonómico de crear unha oficina para asesorar ás empresas afectadas en relación ao Brexit e que se meditaba instalar outra en Reino Unido.
Ademais, Gamallo lembrou que a Fundación Galicia-Europa puxo en marcha "desde hai xa meses" unha web na que se está envorcando toda a información que dispoñen "desde case o inicio das negociacións" da saída de Reino Unido da Unión Europea.
SECTORES MÁIS EXPOSTOS
En relación aos sectores máis expostos de maneira eventual aos posibles efectos prexudiciais do Brexit, o director xeral instou a distinguir entre se hai ou non acordo. Explicou que no sector pesqueiro, se hai acordo, "non hai problema por agora" xa que se manterá o "status quo" e as cousas permanecerán como están. Ademais, engadiu que existe o compromiso de que antes de que finalice o período de transición de 21 meses, antes de xaneiro de 2020, "probablemente en xullo", se peche o tratado pesqueiro entre a UE e o Reino Unido.
No caso de que non haxa acordo, Gamallo lembrou que hai unhas "medidas de continxencia", xa que a Comisión Europea pediu unha reforma do Fondo Europeo Marítimo-Pesqueiro para contribuír ao financiamento das perdas que vai supor isto.
Con todo, engadiu que non están satisfeitos con iso porque o diñeiro do Fondo Marítimo-Pesqueiro xa lles corresponde. Por iso indicou que o que están a pedir son "fondos adicionais" no caso de que non houbese acordo para a frota galega.
OUTROS SECTORES
En canto a outros sectores, Jesús Gamallo insistiu en que teñen as medidas de continxencia que se pacten se non hai acordo de retirada e que "están suxeitas á reciprocidade" por parte dos británicos.
Con respecto aos cidadáns galegos que residen en Reino Unido, o director xeral afirmou que "no que ten que ver cos dereitos dos cidadáns", el transmitiría "unha mensaxe de tranquilidade" a pesar de admitir que se está falando "sempre de futuribles". Deste xeito, indicou que a Comisión Europea articulou outra "medida de continxencia" sobre o Erasmus, que permitirá que os 14.000 estudantes europeos que están a estudar este ano en Reino Unido poderán seguir cobrando as súas axudas e os 4.000 británicos que estudan en universidades da Unión Europea, o mesmo.
Con todo, tanto se hai saída con ou sen acordo, o director xeral de Relacións Exteriores e coa Unión Europea admitiu que nestes momentos "hai moita incerteza" en relación ás decisións que se están tomando no Parlamento británico. Gamallo engadiu que todos están "atónitos" ante o que vai pasar, mentres que se está á espera dunha nova votación prevista para este mércores.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.