Denuncian que o Sergas non facilitou a un paciente o consentimento informado en galego

A Mesa pola Normalización Lingüística denunciou que o Sergas non facilitou a un veciño de Vigo o consentimento informado para unha intervención cirúrxica en galego, que solicitou no Hospital Álvaro Cunqueiro de Vigo. A Mesa sinalou que o paciente pediu en febreiro o escrito en lingua galega, pero que tanto o médico responsable como o departamento de administración dixéronlle que era imposible.

Despois de asinalo en castelán, posto que era imprescindible para ser incluído no rexistro e non perder dereitos na lista de espera, o paciente interpuxo unha reclamación ante a Unidade de Atención ao Paciente, na que esixiu a posta á súa disposición dun consentimento informado para a intervención cirúrxica nun prazo de 20 días hábiles, para que non se vulnerasen os seus dereitos lingüísticos.

Unha vez transcorrido o prazo sen recibir notificación algunha, este paciente estuda emprender accións legais para defender o seu dereito a ser informado documentalmente na lingua que elixa.

12 POR CENTO DE QUEIXAS EN GALEGO

O pasado ano 2018, a Liña do Galego tramitou 303 queixas, das que un 12% estaban relacionadas co Servizo Galego de Saúde, informa a Mesa. Desde a entidade de defensa da lingua destácase que "a administración autonómica con funcións e competencias para garantir estes dereitos non só abdica da súa responsabilidade, senón que é a primeira en incumprir as súas propias normas en relación ao galego".

A directora do Observatorio de Dereitos Lingüísticos, Elsa Quintas, lamentou que "este dato é máis unha evidencia dos pasos atrás que o goberno da Xunta está a dar nos últimos anos en relación ao impulso do uso do galego na administración e no respecto aos dereitos lingüísticos da cidadanía".

Hospital Álvaro Cunqueiro de Vigo | Fonte: Miguel Núñez.