A oportunidade de Rianxo

Este será o meu artigo máis curto porque non son palabras o que se necesita senón vontade. 

En setembro de 2013, publicaba neste mesmo xornal unha colaboración baixo o título Lumes e lumes. Nel procuraba diferenciar os incendios de plantacións de eucaliptos dos lumes nos bosques autóctonos. Non son o mesmo, nin antes nin agora. 

 

Entre Dodro e Rianxo queimáronse máis de 1.000 Has. cubertas principalmente de eucalipto. Podemos deixar que o monte se volva inzar desta especie exótica invasora ou podemos facer algo distinto. Podemos poñernos de acordo nun proxecto de rexeneración real do medio natural. Podemos estudar cales serían os mellores cultivos –forestais e agrarios– neses terreos nos eidos económico, ecolóxico e social. E consensuar entre os distintos axentes involucrados a fórmula óptima para levalo a cabo. 

 

Que axentes? Os Concellos como promotores e coordinadores. Os propietarios dos terreos a alugar ou explotar. Os profesionais agrónomos. As cooperativas agrarias e forestais. As sociedades presentes na cadea de valor dos produtos agrarios e forestais. Idealmente, a Xunta habería apoiar un proxecto así; é a súa obriga inda que tantas veces a desprece en beneficio de grupos privados afíns. En función dos resultados do 28A, o goberno central podería ser un importante axente colaborador, e mesmo a Unión Europea a partir do 26 de Maio. 

 

Velaí queda o reto. Sería o primeiro proxecto da imprescindible  deseucaliptización de Galicia. Ou podería continuar todo igual e daquela sería so un grande incendio máis.