Feijóo sae en defensa da Valedora e di que ela non asinou a súa contratación
“A valedora isto hónralle”, dixo sobre a decisión de Milagros Otero de deixar o seu cargo.
Por Galicia Confidencial | Compostela | 04/04/2019 | Actualizada ás 15:00
O presidente da Xunta, Alberto Núñez Feijóo, destacou a decisión da valedora do Pobo, Milagros Otero, de dimitir despois de que o Tribunal Supremo ratificase a nulidade do nomeamento do posto de xefe de servizo de Administración e Persoal, por "desvío de poder", a María Puy Fraga, sobriña do expresidente Manuel Fraga e irmá do portavoz parlamentario do Partido Popular.
“Fai algo que lle honra”, dixo Feijóo que, con todo, saíu en defensa de Otero e destacou que non foi ela a que asinou o decreto para a contratación da sobriña de Fraga. Ademais, tamén puntualizou que a setenza do TS “non entra no fondo” e “non se pronuncia” sobre ese suposto caso de enchufismo, aínda que o alto tribunal rexeitou o recurso presentada pola valedora.
Os populares sempre defenderon a continuidade de Otero neste cargo a pesar do contundente fallo do Tribunal Superior de Xustiza de Galicia (TSXG) que vía claramente un trato de favor na contratación da sobriña de Fraga. Aínda así, a valedora do Pobo decidiu recurila ao Supremo quen, finalmente, non lle deu a razón.
De feito, na súa comparecencia en xullo de 2018 --tras coñecerse xa o fallo do TSXG--, Otero admitiu que na resolución de abstención "non especificou a causa concreta, debido a que consideraba que era de público coñecemento que é discípula académica do pai dunha das persoas que concorría".
ACORDO
“Fixo o que tiña que facer, poñer o seu cargo a disposición do Parlamento que é o que tería que facer calquera que tivera que ver con esa contratación”, engadiu Feijóo que aclarou que, agora, tócalle aos grupos da Cámara poñerse de acordo para elixir unha ou un substituto para este cargo.
De feito, tras coñecerse este mércores a decisión do Tribunal Supremo todos os grupos da oposición pediron a dimisión de Otero. Agora, terá que ser a Cámara a que elixa a outra persoa que terá que ser co consenso de, polo menos, dous grupos, xa que se precisa do respaldo de, cando menos, tres quintas partes dos deputados.
