Motivos para presumir de dieta atlántica

Unha experta defende que algúns alimentos desta dieta preveñen o cancro e o envellecemento e apuntan a unha mellor esperanza de vida.

Por E.P. | MADRID | 05/04/2019 | Actualizada ás 18:16

Comparte esta noticia

Os compostos dalgúns alimentos da Dieta Atlántica, por exemplo os grelos, preveñen o cancro e o envellecemento, o que podería explicar a lonxevidade da poboación galega, segundo a doutora Ana Belén Crujeiras, do Instituto de Investigación Sanitaria de Santiago de Compostela.

A experta participou este venres na terceira edición do Simposio Internacional sobre Dieta Atlántica, organizado pola Fundación Dieta Atlántica da Universidade de Santiago de Compostela, que reuniu na Facultade de Medicina e Odontoloxía a case 200 asistentes entre investigadores, médicos, estudantes e empresas agroalimentarias e do sector saúde.

No encontro, diferentes expertos reivindicaron a Dieta Atlántica como "modelo de alimentación saudable e sustentable desde o punto de vista ambiental". Ao ser rica en vexetais, en produtos locais e de tempada posúe unha pegada de carbono máis baixa que aquelas ricas en carnes, propias de países do norte de Europa, segundo un estudo publicado na revista 'Science of the Total Environment', que compara un total de 66 patróns dietéticos en todo o mundo.

Así mesmo, Crujeiras lembrou que, segundo un estudo da Universidade de Porto, Galicia é unha das zonas de Europa onde unha maior porcentaxe da poboación supera a esperanza de vida con 4 puntos por encima da media, situándose en 83 anos.

A doutora explicou o concepto de "dieta epixenética" a través da cal se demostra que "os mecanismos epixenéticos regulan a expresión dos xenes para promocionar a saúde ou a enfermidade dependendo do ambiente e o estilo de vida". "Demostramos que existen marcas implicadas no desenvolvemento da obesidade e a resistencia á insulina", indicou a investigadora.

Lacón con grelos en conserva de Embutidos Lalinense
Lacón con grelos en conserva de Embutidos Lalinense

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta