O Complexo Hospitalario de Ferrol incorpora un láser de alta potencia para tratar os cálculos urinarios

O Servizo de Uroloxía do Complexo Hospitalario Universitario de Ferrol informou este xoves da incorporación dun 'láser holmiun' de alta potencia para a fragmentación de cálculos urinarios. Así, segundo informou a Xunta, a xerencia integrada adxudicou o arrendamento con opción a compra deste láser, unha decisión que inclúe o seu mantemento e a subministración sucesiva das fibras necesarias para a realización das técnicas de tratamento da litíase (pedras no ril) e dalgúns casos moi definidos de tumores do tracto urinario. Nesta operación investiranse máis de 157.000 euros.

Na área sanitaria ferrolá, explicou a Xunta, trátanse uns 100 pacientes ao ano con cálculos urinarios. Na actualidade, o Servizo de Uroloxía emprega procedementos endourolóxicos no ámbito diagnóstico, e os pacientes con patoloxías subsidiarias de emprego do 'láser holmiun' son tratados fundamentalmente por cirurxía laparoscópica. A incorporación desta tecnoloxía permitirá realizar os procedementos terapéuticos evitando a cirurxía aberta ou laparoscópica, ao dispor dun mecanismo de fragmentación dos cálculos. Supón, indica a Xunta, "incorporar maior eficacia e seguridade ao proceso".

Ademais da endouroloxía, o 'láser holmium' emprégase tamén para o tratamento dos cálculos vesicais, que agora se estaban tratando con cirurxía aberta; e tamén é posible o seu emprego nunha porcentaxe de casos seleccionados de tumores de tracto urinario superior (uréteres e ril), segundo o seu tamaño, localización ou características do tumor.