Por E.P. | SANTIAGO DE COMPOSTELA | 24/04/2019 | Actualizada ás 13:28
A conselleira de Política Social, Fabiola García, e o reitor da USC, Antonio López, asinaron este mércores o convenio polo cal a institución compostelá se suma ao programa 'Correspondentes Universitarios' da Xunta, para pór en marcha un grupo de voluntarios que "melloren a comunicación" dos programas de Xuventude cara aos estudantes.
Esta iniciativa, que xa leva dous anos activa nas universidades da Coruña e Vigo, busca "que sexan os propios estudantes os transmisores" da información interesante para os mozos, de modo que se mellore a comunicación dos distintos programas dispoñibles para a mocidade galega, explicou a conselleira.
Os 'correspondentes' facilitarán o material sobre "distintos temas de interese" para este colectivo, así como de programas de Xuventude, difundirán información nos espazos universitarios e a través do "boca a boca" e, para mellorar a súa actividade, "asistirán ás reunións e cursos de formación de Xuventude".
Como contraprestación á súa participación, dixo Fabiola García, os participantes recibirán gratuitamente o Carné Xove, o Carné Internacional e o Carné de Alberguista e o seu labor recoñecerase a través dun certificado de habilidades e coa validación de ata tres créditos. Tras a firma do acordo, o reitor da USC destacou a importancia dun programa como este para levar a información aos mozos, unha tarefa "difícil" polo rápido avance das novas tecnoloxías que empregan.
De feito, dixo Antonio López, a universidade busca continuamente "novas canles" para trasladar a información aos estudantes, entre eles a futura creación dunha 'App' con todos os datos académicos e avisos. A intención da USC, segundo confirmou a directora xeral de Xuventude, Cristina Pichel, é "perfilar nos próximos meses" a selección dos mozos que participarán, coa idea de polo en marcha para o próximo curso. Inicialmente, exponse seleccionar un correspondente por cada unha das 25 facultades.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.