O portavoz municipal de Ferrol en Común irá dentro dunha lista electoral en Ares
Álvaro Montes quedou fóra de todas as decisións do goberno municipal que preside Jorge Suárez, o que motivou a súa exclusión da lista electoral deste partido, que sen embargou avalou coa súa firma.
Por E.P. | SANTIAGO DE COMPOSTELA | 24/04/2019 | Actualizada ás 17:49
O portavoz do grupo municipal de Ferrol en Común no Concello de Ferrol, Álvaro Montes, forma parte da lista electoral de Son de Ares-Son en Común ao municipio de Ares (A Coruña) nas próximas eleccións municipais do 26 maio, na que ocupa o posto número oito.
O distanciamento de Álvaro Montes co resto de integrantes de Ferrol en Común non é novo e a pesar de ser o portavoz municipal as friccións xa comezaron a principios do mandato. Co avance dos meses, Montes quedou fóra de todas as decisións do goberno municipal que preside Jorge Suárez, o que motivou a súa exclusión da lista electoral deste partido, que sen embargou avalou coa súa firma.
Así, unha das últimas decisións que tomou Montes foi abandonar órganos de representación municipal, como a súa dimisión do consello de administración da empresa mixta de augas de Ferrol, Emafesa, da que o Concello é o socio maioritario. Montes formará parte dunha candidatura que encabeza Gustavo Pita, que é actualmente o único concelleiro que ten Son de Ares no municipio costeiro situado na comarca de Ferrolterra.
TRAXECTORIA
A inclusión de Montes en Son de Ares débese, segundo apuntaron varias fontes consultadas, á súa amizade con Gustavo Pita, co que sempre mantivo unha relación moi cordial. Nas eleccións de maio de 2015 Álvaro Montes integrouse en Ferrol en Común como representante de Anova, formación política á que xa non pertence. Licenciado en Ciencias Políticas pola Universidade de Santiago (USC), este ferrolán, do barrio de San Juan, militou en varios partidos. Así, iniciouse en Galiza Nova, a formación xuvenil do BNG, para pasar posteriormente a estar integrado no partido nacionalista.
Tras a asemblea de Amio, que supuxo a factura do Bloque en xaneiro do 2012, Montes marchou a Compromiso por Galicia (CxG), onde chegou a ser candidato ao Parlamento Europeo, pero non logrou ser elixido. Foi entón cando recalou en Anova, desde onde deu o salto á política municipal, integrándose en Ferrol en Común, ocupando o posto número tres en 2015. Desde o inicio do actual mandato foi portavoz municipal e é un dos edís que dispón de dedicación exclusiva.
