A Xunta suspende o plan de transporte mentres defende "o rigor e a corrección" do mesmo

A Xunta defende "o rigor e a corrección" do plan de transporte, despois de que o Tribunal Administrativo de Contratación Pública de Galicia decretase a súa suspensión de forma cautelar a petición das patronais do sector.

Nun comunicado, a Consellería de Infraestruturas sostén este sábado a "absoluta corrección xurídica" da licitación en curso, á vez que garante que "se mantén invariable o conograma que prevé que os novos contratos de transporte empecen a funcionar o próximo mes de agosto".

Ademais, remarca que é preferible non avanzar na licitación mentres o tribunal non se pronuncie sobre o recurso anunciado polas patronais do transporte. Por iso, o Goberno galego explica que non argumentou contra a suspensión para que existan "plenas garantías xurídicas". Desta forma evítase o posible prexuízo aos licitadores e ao servizo público, engade.

Xunto a isto, lembra que conta co aval do pronunciamento ao seu favor do Tribunal Administrativo Central de Recursos Contractuais ante un recurso similar presentado polas federacións de transporte en 2017.

SENTENZA

O Tribunal Administrativo de Contratación Pública de Galicia decretou a suspensión de forma cautelar do plan de transporte da Xunta a petición das patronais do sector, que reclamaron esta medida cautelar con carácter previo á presentación de recurso por observar "deficiencias" na valoración económica para a contratación de liñas.

Nunha resolución con data do 26 de abril, o tribunal acepta así a petición de catro federacións de transporte de viaxeiros: Anetra, Fegabús, Fegatravi e Transgacar. Respecto diso, a Xunta sinala que non se opón a esta medida cautelar en favor da "máxima seguridade xurídica", aínda que solicita tamén que afecte o prazo de presentación de ofertas (era ata o 3 de maio), cuestión que acepta o Tribunal Administrativo de Contratación Pública.

Precisamente, esta semana o sindicato CIG avanzou a súa intención de levar aos xulgados estes contratos, xa que "están infravalorados na súa dotación económica" e "son ruinosos" para as empresas. Ademais, remarcou a intención de recorrer por parte das patronais.

PLAN DE TRANSPORTE

A Xunta aprobou recentemente a licitación dos 100 primeiros contratos --para entrar en funcionamento en agosto-- de transporte público que operarán en Galicia durante a próxima década no marco da última fase do seu plan, que incluirán 50 contratos máis que sairán a información pública en xuño.

Ese centenar de contratos abarcar unhas 2.000 liñas, das cales preto do 70% serán buses de uso compartido entre viaxeiros adultos e escolares. Supoñen un volume de negocio duns 630 millóns, dos cales 500 millóns proveñen das arcas da Comunidade.

"PREOCUPACIÓN" DO PSDEG

O PSdeG mostrou este sábado a súa "preocupación" pola suspensión cautelar do plan de transporte da Xunta, polo que esixirá explicacións ao Goberno galego no Parlamento. Nun comunicado, o portavoz de Transporte do Grupo Socialista, Luís Álvarez, avanza a presentación de iniciativas parlamentarias para reclamar á Xunta que informe no Parlamento e outorgue seguridade xurídica ás concesións.

E é que remarca que esta suspensión afecta á maioría das concesións do servizo público de transporte, no marco dun plan que tería que entrar en funcionamento en agosto nas liñas de autobús. Lembra que, con base no apuntado pola Consellería de Infraestruturas, o 7 de agosto deberían entrar en funcionamento máis de 1.900 liñas de bus dun centenar de contratos de explotación.