Por E.P. | OURENSE | 03/05/2019 | Actualizada ás 13:39
O conselleiro de Medio Rural, José González, visitou este venres as instalacións da parcela Valverde, situada no concello ourensán de Allariz e cedida á Asociación empresarial galega de centros especiais de emprego sen ánimo de lucro (Cegasal), onde destacou a importancia de fomentar a economía social no medio rural galego aproveitando os seus propios recursos.
Os terreos que visitou o conselleiro teñen unha superficie de algo máis de 176.000 metros cadrados, cun uso principal agrario, nos que a asociación realiza un traballo "modélico" no campo da integración social. A maiores, puxo en valor o carácter multisectorial desta entidade, que aposta por facilitar a inserción laboral de persoas con discapacidade, a través do labor que se realiza nos centros especiais de emprego de iniciativa social e cos propios traballadores.
Nesta liña, José González destacou que, no modelo de medio rural que defende a Xunta, teñen cabida todos os colectivos sociais e, especialmente, aqueles que se esforzan por pór en valor os recursos endóxenos do campo. Trátase, segundo indicou, de impulsar "un medio rural vivo e dinámico", que aposte pola rendibilidade económica, social e ambiental.
Ademais, o conselleiro destacou que Cegasal está presente en máis de 14 sectores produtivos, desde as artes gráficas ata a alimentación, pasando pola atención socio-sanitaria ou o transporte, e explicou que tamén traballa no campo dos servizos de xardinaría, viverismo e no sector agrícola e gandeiro.
Cegasal aglutina a centros especiais de emprego sen ánimo de lucro de Galicia, dando así "maior visibilidade á economía social" e ás iniciativas que aglutina. Creada no ano 1997, mantén como funcións principais da súa razón de ser a negociación colectiva no sector, o diálogo social, a participación institucional, a xestión económica ou a promoción empresarial.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.