Avanza a venda de NGB a La Caixa
A pésima imaxe creada polas enormes indemnizacións cobradas polos ex-directivos provoca que Novagalicia Banco perda máis do 4% dos depósitos en só oito meses.
Por Walter Burns | Barcelona | 10/01/2012 | Actualizada ás 00:35
Os datos sobre unha oferta de Caixabank, propiedade de La Caixa, por Novagalicia Banco, da que GC informou en primicia, comezan a acumularse. Hoxe son varios os blogs especializados no sector bancario os que confirman a "boa disposicón" dos cataláns para realizar unha oferta pola entidade galega, nacionalizada en máis do 90% polo Estado para salvala da quebra.
De Guindos busca compradores para as caixas nacionalizadas
Ademais, o diario ABC confirma que o ministro de Economía, Luís de Guindos, xa está a falar con bancos e caixas para impulsar unha nova vaga de fusións. Cómpre ter en conta que Mariano Rajoy prometeu que en seis meses completaría a "reordenación" do mercado financeiro, rescatado in extremis polo Estado tras o fiasco do 'boom' do ladrillo.
A cabeceira madrileña cita fontes do Ministerio de Economía para aventurar que das 17 entidades que sobreviven finalmente só resistirán a metade. O resto será engulida en fusións ou, en último caso, malvendida nunha poxa pública.
Unha das vítimas, salvo sorpresa maiúscula, será a entidade galega. Iso si, o presidente de NGB, José María Castellano, ten unha opción preferente sobre o 20% do capital até setembro. Este acordo asinado polo anterior Goberno podería atrasar a operación até finais de outono, probable data das eleccións autonómicas.
Problemas para captar investidores e conservar clientes
Até daquela, Castellano, o ex-número 2 de Inditex, seguirá intentando captar investidores que permitan a consolidación dunha entidade solvente e galega, como prometeu o presidente da Xunta. A misión de Castellano parece moi complicada en plena recesión. De feito até o de agora captou moito menos capital do compremetido por el mesmo cando se fixo co control de NGB co aplauso de Feijóo. O certo é que o prestixio de bo xestor que din posúe Castellano non é quen de compensar a mala imaxe pública que arrastra Novagalicia Banco (NGB) polo seu complicado parto.
O escándalo dos cobros dos directivos de Caixanova e Caixa Galicia, xermes de NGB, provocou que moitos cidadáns retirasen os seus cartos da entidade galega. Segundo datos da CECA, a patronal das caixas, NCG perdeu 1.900 millóns en depósitos dos seus clientes, máis do catro por cento, entre xaneiro e outubro de 2011. Un dato pésimo para que Castellano logre atraer novos investidores privados.
O PP busca un cabeza de turco
Por outra parte, a voceira do Goberno de España culpou onte ao gobernador do Banco de España das enormes indemnizacións que cobraron os directivos que levaron a Caixanova e Caixa Galicia a rentes da quebra antes de deixar a entidade rescatada polo Estado.
En opinión de Soraya Sáenz de Santamaría nunha entrevista na TVG, Miguel Angel Fernández Ordóñez "non estivo nada fino nin nada explícito á hora de cumprir coas súas obrigas na vixilancia dos emolumentos que podían recibir cando se retirasen dos seus postos altos cargos non só das caixas galegas, senón tamén dalgunha outra".
O que non dixo Sáenz é que militantes do seu partido estaban nos consellos de administración das dúas caixas cando aprobaron os máis de 30 millóns de indemnizacións cobrados polos hoxe retirados Méndez, Gayoso e os seus subordinados. A voceira tampouco dixo que o presidente da Xunta negouse a que o Parlamento de Galicia investigase estas comisións, alegando que podería prexudicar á consolidación da nova entidade.
Miguel Angel Fernández Ordóñez ten seis meses máis garantidos no seu cargo, segundo a lexislación que en teoría garante a independencia do Banco de España respecto ao Goberno. Con todo, das palabras da número 2 de Rajoy dedúcese que será relevado en canto sexa posíbel.
La Caixa ten xa máis de 190 oficinas e 700 empregados en Galicia. A adquisición de NCG serviríalle para consolidar o seu liderado na banca minorista española.
