Patxi López (PSOE): "Europa enfróntase ao reto de frear a extrema dereita nacional, populista, xenófoba e racista"

O ex-presidente do Congreso e secretario de Política Federal do PSOE, Patxi López, puxo o foco no "gran reto" ao que se enfronta Europa. "Por primeira vez na súa historia, Europa terá que facer fronte a esa extrema dereita nacional, populista, xenófoba e racista, encarnada en figuras como Salvini, Orban, Abascal ou Le Pen, que se están organizando para presentarse xuntos a unhas eleccións", declarou. Así o expresou o tamén ex-lendakari este luns en Ourense durante un percorrido pola cidade no que arroupou ao candidato socialista á Alcaldía de Ourense, Rafael Rodríguez Villarino. No encontro tamén participou o secretario xeral do PSdeG, Gonzalo Caballero.

Patxi López sinalou que a extrema dereita "vén precisamente a destruír os alicerces europeos". "Para facerlle fronte estamos os socialistas dispostos a devolver a Europa a civilidade, os dereitos, as liberdades e as oportunidades colectivas e, todo iso, decídese o próximo 26 de maio", sostivo.

O actual secretario de Política Federal do PSdeG aproveitou a súa vista á cidade das Burgas para agradecer "en nome do conxunto dos progresistas de España" o papel que xogou Galicia "como unha das puntas de lanza do triunfo socialista do pasado 28 de abril". "Por primeira vez na historia, os socialistas gañamos as eleccións en Galicia porque os galegos entenderon a importancia do que estaba en xogo e non quedaron en casa", subliñou.

"O PP ESPERA A VOX PARA GOBERNAR"

Pola súa banda, o secretario xeral do PSdeG sostivo que "o Partido Popular segue a estratexia da avestruz". "Feijóo di que a ultradereita non vai entrar nos concellos e, o mesmo día, o secretario xeral do PPdeG, Tellado non descarta apoiarse en Vox para recuperar cidades", destacou.

Para Caballero isto só se entende dun modo: "Se ao PP non lle dan as contas, Feijóo, Tellado e o seu cinismo político abrazaranse coa ultradereita con tal de manter o poder custe o que custe".

Así mesmo, en clave galega aludiu a que "Feijóo está fóra de xogo, cada vez máis pequeno, máis asustado e máis descolocado porque as enquisas non lle dan e, sobre todo, cando se atopa unha nova realidade social na rúa".