Villares sae en defensa dos gobernos do cambio en Santiago e A Coruña
"Quen pense que as municipais son unha segunda volta das xerais levará unha decepción", di o portavoz de En Marea que resta importancia ás enquisas. Pide a Pedro Sánchez que derrogue a coñecida como 'Lei Montoro'.
Por Europa Press / Redacción | SANTIAGO DE COMPOSTELA | 14/05/2019 | Actualizada ás 14:18
O portavoz de En Marea, Luís Villares, remarcou que as eleccións municipais deben desligarse das xerais celebradas hai un mes, algo do que, na súa opinión, a cidadanía consciente pois "sabe distinguir os procesos electorais".
"Quen pense que isto (municipais) é unha segunda volta das xerais equivócase e vai levar unha decepción", aseverou Villares a preguntas dos medios durante unha rolda prensa celebrada este martes na sede da Mesa pola Normalización Lingüística en Santiago.
"A cidadanía sabe distinguir os procesos electorais. As xerais teñen un obxectivo e as municipais outro, que é a xestión en grao sumo próximo. A xente sabe perfectamente que proxecto vota e que persoas vota", remarcou o portavoz do partido instrumental, que cre que esta cita coas urnas opera nunhas coordenadas diferentes ás existentes hai un mes coas eleccións ás Cortes.
Deste xeito, opina que o pasado 28 de abril "as siglas si tiveron peso e esa é a inercia que leva a que nas primeiras enquisas saian eses resultados", en referencia ás sondaxes que pon na cabeza ao Partido Socialista en case todas as cidades galegas.
Tras lembrar que en 2015 as enquisas fallaron ao non prever a vitoria de Compostela Aberta en Santiago, Villares apelou á bolsa de "indecisos e xente que non revela o seu voto" como unha das "claves" do próximo 26 de maio, unha cita na que cre que a campaña será fundamental. "Para iso valen as campañas, para disipar as dúbidas e para seducir aos indecisos", apostilou.
VISITA DE SÁNCHEZ A GALICIA
No día en que o presidente do Goberno en funcións, Pedro Sánchez, visita Galicia para participar na campaña dos socialistas galegos, Villares teorizou con que a aterraxe de representantes públicos "nin dá nin quita unha xestión municipal".
Ademais, reclamou ao vencedor nas pasadas eleccións xerais que derrogue a coñecida como 'Lei Montoro', unha normativa de estabilidade orzamentaria para as entidades locais que pon en "dificultades" aos concellos para aplicar políticas públicas.
Así, Villares lamentou que o PSOE consolidase "unha reforma aprobada durante o goberno do popular Mariano Rajoy" e que "está atenazando" aos consistorios "comprometidos coa xustiza social" como A Coruña e Santiago, gobernados por Marea Atlántica e Compostela Aberta.
