Por E.P. | SANTIAGO DE COMPOSTELA | 10/06/2019 | Actualizada ás 15:43
Os grupos da oposición aproveitarán o pleno que arrinca este martes no Parlamento de Galicia para urxir ao Goberno autonómica a "saír da inercia" e, a través do exercicio das súas competencias, buscar solucións para o futuro da industria electrointensiva ante a situación aberta en Alcoa e Ferroatlántica.
Este asunto centrou as intervencións dos portavoces da oposición --Luís Villares (En Marea), Xoaquín Fernández Leiceaga (PSdeG) e Ana Pontón (BNG)-- nas roldas de prensa celebradas no Pazo do Hórreo este luns, véspera do arranque da sesión plenaria.
E é que o futuro de Alcoa, pendente de comprador para as súas plantas na Coruña e Avilés, e a venda de FerroAtlántica ao fondo TPG Sixth Street Partners por 170 millóns de euros, serán dous dos temas nos que centrarán as súas iniciativas parlamentarias e preguntas os grupos da oposición, que coinciden en que a Xunta non fai "todo o que está na súa man" para garantir o mantemento das plantas asentadas en Galicia.
En Marea, da man do seu portavoz, Luís Villares, presentou unha batería de medidas "para garantir o futuro da industria electrointesiva e baixar o recibo da luz a empresas e familias".
Para Villares, a Xunta atópase "entregada totalmente aos interess das grandes eléctricas", o que "impide" que desde a súa acción de goberno poidan pór en marcha políticas que permitan o mantemento dos postos de traballo en Alcoa, Ferroatllántica ou Celsa Atlantic; pero tamén "acabar coa estafa" da factura da luz.
Entre as propostas de En Marea figuran que se suspenda ata setembro a poxa de cinco bloques de 40 MW de interrumpibilidad aos que podería optar as plantas de Alcoa e Ferroatlántica, así como a creación da 'tarifa ARENHH' que xa funciona en Francia e que permite o acceso regulado á electricidade nuclear e hidráulica histórica.
Ademais, reclaman que figure por escrito nos documentos de venda de Ferroatlántica a garantía de "competitividade" para as factorías da empresa en Cee e Dumbría; e para Alcoa, que o Goberno do Estado estea listo para a interevención pública das factorías no caso de que non apareza un comprador nas próximas semanas.
Pola súa banda, o portavoz parlamentario do PSdeG, Xoaquín Fernández Leiceaga, insistiu este luns na creación dun "marco" que permita "superar as debilidades" de Galicia á hora de afrontar situacións "difíciles" como a que está a vivir Ferroatlántica.
Así, os socialistas galegos presentarán no Pleno deste martes unha pregunta ao Goberno para conseguir da Xunta a información dispoñible e reclamarlle os incentivos postos enriba da mesa e a súa implicación supervisando a venda da planta da Costa da Morte.
O portavoz socialista urxiu a Xunta a "saír da súa inercia" para tutelar a operación aberta por Ferroglobe coa venda da planta galega a un fondo de investimento.
Tamén a portavoz nacional do BNG, Ana Pontón, criticou a situación de Ferroatlántica, xa que considerou que é un "novo movemento" de Villar Mir (propietario de Ferroatlántica), "que parece que quere dar un novo pelotazo a conta de vender un patrimonio dos galegos" (en relación ás centrais hidroeléctricas).
"Temos claro que Galicia non está para salvarlle os mobles a Villar Mir, un empresario que se nos últimos tempos se caracterizou por algo é pola súa vinculación coa corrupción do PP. Galicia non está para pagar a corrupción popular nin as débedas e a mala xestión de Villar Mir noutras partes do territorio", sentenciou Pontón.
A líder do Bloque avanzou que neste pleno abordará a situación tanto de Alcoa como de Ferroatlántica. No primeiro caso a través dunha proposición non de lei na que se reclama un marco enerxético "estable" e o apoio do Parlamento para "deixar claro" ante o Estado que a "única alternativa" para a fábrica da Coruña pasa por manter a produción e o emprego.
No caso de que chegado o 30 de xuño as posibles ofertas de adquisición non cumpran ambos os requisitos, "a única oferta que lle vale a Galicia" é que o Goberno central "interveña temporalmente" a factoría. Sobre Ferroatlántica insistiu en que o BNG "quere que Feijóo se pronuncie" xa que teñen "serias dúbidas" desa operación.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.