O alcalde de Ourense tenta 'suavizar' así as súas críticas aos funcionarios: "Hai xente con talento entre as mazás podres"

Pérez Jácome mantén, ademais, que existe unha "mafia policial" no Concello.

Por Europa Press / Redacción | SANTIAGO DE COMPOSTELA | 19/06/2019 | Actualizada ás 17:50

Comparte esta noticia

O alcalde de Ourense, Gonzalo Pérez Jácome, tentou 'suavizar' este mércores, no seu terceiro día de mandato, as súas críticas aos funcionarios públicos do Concello, sobre os que verteu duras acusacións durante anos. Deste xeito, resaltou que "existe xente con talento e vontade entre as mazás podres".

PARA MAURO OURENSE Jácome
PARA MAURO OURENSE Jácome | Fonte: Europa Press

Esta afirmación sostívoa este mércores despois da xunta de goberno local constitutiva e un día despois de establecer, como primeira medida do seu mandato, o control horario dos funcionarios.

"É algo que hai que facer si ou si. Desde Democracia Ourensana levabamos pedíndoo nas nosas mocións desde hai moito tempo e agora é obrigatorio por lei", resaltou o alcalde de Ourense.

O persoal do Concello mostrouse molesto por este feito, non pola decisión en si, que din "comprender", senón por ser a primeira actuación do novo alcalde cando consideran que "hai outras cuestións moito máis importantes".

"MAFIA POLICIAL"

O pasado martes, Jácome protagonizaba unha nova polémica ao afirmar que existe unha "mafia policial" na Policía Local de Ourense despois de ser multado por estacionamento indebido no seu primeiro día de mandato.

Considera que é "unha das moitísimas cousas que funcionan mal no Concello de Ourense". Deste xeito, Jácome mantivo este mércores o seu cualificativo e, é máis, ampliouno a outros departamentos do Concello onde existe a que denominada como "unha mafia do escaqueo".

A este respecto, sostivo que "é fundamental enfocar o tema e porlle coto a aquelas mazás podres que estragan as demais". "Non podemos tolerar que alguén que traballa se vexa desmotivado porque o da súa beira gaña o mesmo ou máis sen facer nada", recalcou.

"FALTAN TÉCNICOS CUALIFICADOS"

O novo alcalde continúa reuníndose cos funcionarios do Concello e xa solicitou un encontro cos sindicatos. En materia de persoal, Jácome sinala dous grandes problemas: "a mala distribución" e "a falta de técnicos cualificados".

A este respecto, xa pediu ao encargado provisional de Persoal que lle facilite unha relación de todas as persoas que traballan no Consistorio xunto cos seus cargos, dado que "hai departamentos nos que falta persoal e outros nos que sobra".

En segundo lugar, vai levar " a cabo de maneira prioritaria a contratación de técnicos cualificados". De feito, Jácome sostivo que están a ser "tremendamente expeditivos", posto que xa están a buscar un xefe de Persoal.

Pola súa banda, na súa valoración logo pasadas as primeiras 48 horas como rexedor dixo atoparse o Concello "moito peor do que pensaba" a nivel organizativo e describiuno como "un caos".

JORGE PUMAR, TENENTE DE ALCALDE

O alcalde asinou este mércores o decreto de nomeamento como tenente de alcalde único do Concello de Ourense ao concelleiro do grupo municipal do Partido Popular Jorge Pumar Tesouro.

Este tamén forma parte de Xunta de Goberno Local, que durante a mañá deste mércores aprobou a contratación de artistas, infraestruturas, escenarios e equipos de luz e son para as Festas do Corpus de Ourense 2019.

Democracia Ourensana, a formación liderada por Jácome, tamén deu a coñecer este mércores a relación dos deputados provinciais que representarán ao seu partido na Deputación: Armando Ojea Bouzo e Miguel Caride Domínguez.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta