O delegado do Goberno trasladará ao Executivo as demandas de maior financiamento da RAG

O delegado do Goberno en Galicia, Javier Losada, comprometeuse a trasladar ao Executivo central as demandas de maior financiamento da Real Academia Galega (RAG). Fíxoo nunha visita a esta institución, onde foi recibido polo presidente da RAG, Víctor F. Freixanes, ante o que reiterou o "compromiso" do Goberno coa promoción e uso do galego.

Así o manifestou tamén, en declaracións aos xornalistas, Javier Losada, quen asegurou que traballará para que a institución académica teña un financiamento "en consonancia" co que a súa actividade supón. En concreto, remarcou o seu labor para manter "a unidade da lingua" e insistiu na importancia de que teña "todos os medios posibles". "As mesmas achegas que teñen outras Reais Academias", sentenciou.

Pola súa banda, o presidente da RAG lembrou que existe desde hai anos "un compromiso" para a remodelación do edificio. "Polo menos a súa adaptación ás necesidades que ten", remarcou. Sobre a remodelación do inmoble, lembrou que houbo "un concurso, cun gañador" e que o orzamento inicial roldaba o millón de euros. No entanto, incidiu na importancia de que os compromisos se concreten nos Orzamentos Xerais do Estado (PGE).

O delegado do Goberno visita a RAG. DELEGACIÓN DO GOBERNO | Fonte: Europa Press