Licitadas as obras de remodelación para a estación de ferrocarril da Coruña
En total o proxecto para a intermodal, que terá que aprobar o Consello de Ministros, disporá de 48,5 millóns de investimento entre os anos 2019 e 2022.
Por E.P. | A CORUÑA | 26/06/2019 | Actualizada ás 15:11
O Consello de Administración de Adif aprobou este mércores a licitación das obras de remodelación da estación de ferrocarril da Coruña, segundo anunciou o delegado do Goberno en Galicia, Javier Losada, tras unha reunión coa alcaldesa da Coruña, Inés Rey.
En rolda de prensa, Losada indicou que Adif aprobou "o expediente de contratación, dos pregos, do gasto e apertura do procedemento de adxudicación das obras de remodelación da estación de San Cristóbal para adaptalas á chegada da alta velocidade".
En total o proxecto para a intermodal, que terá que aprobar o Consello de Ministros, disporá de 48,5 millóns de investimento entre os anos 2019 e 2022, co groso da remodelación en 2020 e 2021, cando se prevé que se invistan 46 millóns de euros. As cantidades restantes distribuiranse nos anos 2019 e 2022.
Entre as principais actuacións que se realizarán, segundo detallou o delegado, destacan a rehabilitación de espazo baixo a marquesiña histórica, a remodelación da planta baixa do edificio de viaxeiros, a creación dunha nova sala de embarque e a creación dunha cuberta sobre as plataformas.
Así, está prevista a actuación "na praia de vías e plataformas, coa modificación da configuración das vías e plataformas para dispor de seis vías de ancho ibérico e tres plataformas de oito metros de ancho". Ademais, as obras permitirán "integrar barrios" cunha pasarela peonil, mellorar a praza da estación, remodelar o aparcadoiro en superficie e dotar dun novo acceso para vehículos.
ALFONSO MOLINA E VIARIO 18
Pola súa banda, a alcaldesa destacou os "10 días de intenso traballo" á fronte do goberno municipal para "retomar o diálogo institucional" e avanzar nas infraestruturas que suporán o "arranque" da cidade.
Con respecto á remodelación da avenida de Alfonso Molina, Javier Losada confirmou que "avanza a redacción do proxecto", cun orzamento de case 23 millóns de euros. "Esta actuación divídese en tres proxectos e entre eles demos prioridade á pasarela de Pedralonga", dixo o delegado.
Sobre o Viario 18, que conectará a AP-9 coa AC-14, o delegado do Goberno informou de que o Ministerio de Fomento traballa "redactando o informe de alegacións para obter unha declaración de impacto ambiental positiva".
