A Rede Localis sinala que só sete concellos galegos reúnen as condicións para ser un municipio "intelixente"
A Rede Localis lamenta que entre as entidades locais galegas "apenas hai experiencias para mellorar o medio ambiente, a cohesión social e o capital humano e promoción do desenvolvemento económico
Por E.P. | SANTIAGO DE COMPOSTELA | 01/07/2019 | Actualizada ás 19:40
Só sete dos 313 concellos de Galicia reúnen as condicións para ser un municipio "intelixente" e unicamente 18 localidades apostan por converterse nunha 'smart city', segundo o último informe elaborado por Rede Localis, a entidade investigadora sobre a administración local. O documento, presentado este luns en Ourense, sinala que menos dunha vintena de municipios deron pasos para implementar a "intelixencia" na xestión dos servizos públicos.
Trátase da Coruña, Arteixo, Narón, Ferrol, Ames, Culleredo, Marín, Pontevedra, Vigo, Redondela, Ponteareas, Lalín, A Estrada, Sanxenxo, O Grove, Santiago, Lugo e Ourense. Así, Rede Localis apunta que, ata o momento, as iniciativas céntranse en catro eixos: mobilidade e transporte, enerxía, gobernación e planificiación, e xestión pública.
Por contra, lamenta que entre as entidades locais galegas "apenas hai experiencias para mellorar o medio ambiente, a cohesión social e o capital humano e promoción do desenvolvemento económico". Neste sentido, o profesor da Universidade de Vigo e autor do estudo, Alberto Vaqueiro, apuntou que a "dimensión" dos municipios galegos "debe fomentar as iniciativas conxuntas" entre varios concellos baixo a coordinación das deputacións.
ANÁLISE POR PROVINCIAS
O informe de Rede Localis analiza por provincias a implantación de servizos "intelixentes" nos concellos. En Pontevedra, destaca "o papel" como 'smart city' de Vigo, así como a "forte aposta polos destinos turísticos intelixentes desde varios concellos de forma conxunta", en referencia a Sanxenxo e O Grove.
Rede Localis tamén destaca a "aposta clara polo turismo intelixente" que levan a cabo tanto o concello como a deputación de Ourense, mentres que en Lugo, a capital exerce de "referente" na provincia galega "con menos experiencias ata o momento". Por último, na Coruña, os investigadores resaltan as "estratexias conxuntas" entre varios municipios como o proxecto 'Cidade 2020', impulsado por Ferrol e Narón; mentres a cidade herculina é "o máximo expoñente de cidade intelixente" da provincia.
