Por Europa Press / Redacción | SANTIAGO DE COMPOSTELA | 12/07/2019 | Actualizada ás 18:52
A valedora do Pobo, Milagros Otero, solicitou un aumento de soldo á Mesa do Parlamento en virtude do decreto aprobado polo Goberno central para actualizar os salarios dos empregados públicos en virtude da evolución do Produto Interior Bruto (PIB).
Así o denunciou o Grupo Parlamentario de En Marea este venres, que recolle nun comunicado a carta remitida o pasado 11 de xullo por Otero á Mesa do Parlamento. Nela, pide que se aplique a subida das retribucións tanto a ela como ao adxunto ao Valedor, o que suporía un aumento do 0,25% das cantidades percibidas no primeiros seis meses do ano 2019.
A petición prodúcese cando aínda non foi acordado a substitución de Otero á fronte do Alto Comisionado do Parlamento de Galicia, condición que puxo a actual valedora para abandonar o seu cargo tras ser ratificada polo Tribunal Supremo a nulidade do nomeamento do posto de xefe de servizo de Administración e Persoal, por "desvío de poder", a María Puy Fraga, sobriña do expresidente Manuel Fraga e irmá do portavoz parlamentario do Partido Popular.
O pasado mes de abril, Milagros Otero puxo o seu cargo a disposición da Cámara, que é o órgano que a nomeou, a proposta do PP, e ten o poder de revogala cunha maioría reforzada dos deputados. Pero vinculou a súa renuncia a que os grupos parlamentarios se poñan de acordo previamente sobre o seu substituto á fronte da institución e na Vicevaledoría, que actualmente ocupa Pablo Cameselle (nome impulsado polo PSOE).
Segundo o Tribunal Superior de Xustiza de Galicia (TSXG), a actual valedora influíu no proceso para que o posto recaese na filla do catedrático de Dereito do que ela é discípula académica --como recoñeceu en sede parlamentaria--, chegou a presentar a súa "abstención" no proceso, iso si, despois de que estivesen definidos os criterios da convocatoria e de que se presentaron os candidatos.
De feito, na súa comparecencia en xullo de 2018 --tras coñecerse o fallo do TSXG--, Otero admitiu que na resolución de abstención "non especificou a causa concreta, debido a que consideraba que era de público coñecemento que é discípula académica do pai dunha das persoas que concorría".
"Quedamos absolutamente sorprendidos con esta solicitude e parécenos unha vergoña", afirmou a viceportavoz do Grupo Parlamentario de En Marea, Carmen Santos. A deputada lembra que o salario de Milagros Otero á fronte da institución é de 79.000 euros anuais, "un dos máis altos do sector público" e censura que a petición se produza cando debería "dimitir xa" do seu cargo.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.