Denuncian "ameazas" de Mercadona aos empregados que teñen tatuaxes se non os ocultan

A CIG di que a cadea de supermercados avisa con "sancións" ao persoal.

Por Europa Press / Redacción | SANTIAGO DE COMPOSTELA | 21/07/2019 | Actualizada ás 18:51

Comparte esta noticia

A Confederación Intersindical Galega (CIG) denunciou este domingo que a cadea de supermercados Mercadona "ameaza con sancións" aos empregados que teñen tatuaxes en zonas visibles do corpo se non os ocultan.

Mercadona.
Mercadona.

A organización sindical asegurou que Mercadona "prohibe" as tatuaxes e os piercings en zonas visibles ao seu persoal, "chegando mesmo a ameazar coa imposición de sancións a aqueles traballadores que non os oculten".

Para a CIG, esta "persecución atenta contra os dereitos individuais e constitúe unha manifestación máis da política de férreo control que Mercadona exerce sobre os seus traballadores".

"Aínda que de momento non pasou do aviso verbal, o persoal que ten tatuaxes visibles está a recibir todo tipo de presións e ameazas para que os tapen", explicou a presidenta do comité provincial de CIG na Coruña, María López, quen cualificou esta política laboral como "totalmente extemporánea, vulneradora de dereitos e irrespectuosa" co persoal.

Neste sentido, sinalou que no último convenio colectivo se retiraron aqueles puntos que facían referencia ás sancións por incumprir o aspecto físico esixido aos traballadores. "No entanto, a realidade é que en Mercadona están prohibidos as tatuaxes, do mesmo xeito que os piercings, e que a empresa ameaza con sancionar a quen os luza", sentenciou.

MARINEDA CITY

Segundo a CIG, esta "persecución" non ten a mesma intensidade en todos os centros de traballo, "mentres que nunhas tendas a prohibición se toma con maior laxitude", noutras, como o supermercado de Marineda City, "as ameazas son constantes".

"Tanto é así que un día, aproveitando a ausencia das delegadas da CIG, a encargada reuniu en dúas quendas laborais a todo o persoal para reiterarlles que non poden levar á vista tatuaxes e lembrarlles que quen non cumpra esta obriga pode ser obxecto de sanción", criticaron.

Ademais, aseguraron que ao día seguinte un dos traballadores non cubriu a tatuaxe que ten no brazo e foi "rapidamente chamado á oficina". "Alí, a encargada, con dúas testemuñas, díxolle que tiña que tapalo porque esa é a política da empresa. Cando o traballador lle respondeu que o convenio non recolle nada sobre ese asunto, a encargada díxolle que se dese por informado e lanzoulle ameazas", lamentaron.

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta