A Xunta pide "prioridade" para un acordo pesqueiro entre Reino Unido e UE ante a "incerteza" do Brexit
Fundación Galicia Europa promocionará o Xacobeo 21 e traballará para que a Comunidade "siga percibindo as axudas que lle corresponden" na UE.
- Ferrol acolle unha xornada sobre 'A empresa española ante o Brexit' organizada polo Ministerio de Industria
- O sector pesqueiro español cualifica de "alivio" a entrada en vigor do acordo entre a UE e Marrocos
Por E.P. | SANTIAGO DE COMPOSTELA | 23/07/2019 | Actualizada ás 15:09
O director xeral de Relacións Exteriores e coa Unión Europea, Jesús Gamallo, reclamou este martes que un acordo pesqueiro entre o Reino Unido e a UE "sexa prioritario" de modo que as frotas dos países membros "volvan aos caladoiros británicos antes de que se peche" o acordo que marcará a relación comercial futura.
En declaracións aos medios previos á súa participación na reunión do padroado da Fundación Galicia Europa, Gamallo admitiu que ao Goberno galego preocúpalle "absolutamente todo" dun Brexit sen acordo. "Desde os dereitos dos cidadáns ata o que ten que ver coa política arancelaria", concretou.
Ademais, advertiu que haberá un problema "importante" no sector pesqueiro se o 31 de ocubre --data límite, tras a última prórroga, para a saída do Reino Unido da UE-- a frota galega "ten que saír das costas británicas".
En calquera caso, o director xeral asegurou que hai previstas "medidas de continxencia", tamén por parte do Executivo estatal e da Comisión Europea. Con todo, reclamou que estas solucións non se custeen co Fondo Europeo Marítimo e de Pesca (FEMP), "que está para outras cousas".
Neste contexto, cifrou en 1.700 tripulantes e máis de 50 empresas --tanto de capital galego como de armadores galegos-- que se verían afectados por un Brexit sen acordo.
OS FONDOS ESTRUTURAIS, "NO AIRE"
Gamallo non ocultou que o marítimo sería o tema que "máis preocupa" a Xunta ante os "riscos" e "incerteza" que todo iso xera. E é que, no ámbito do financiamento comunitario, este escenario deixa "no aire" a aplicación dos fondos estruturais para o actual exercicio "porque (o Reino Unido) non teñen por que recoñecer as súas obrigacións financeiras".
Pola súa banda, o vicepresidente da Xunta, Alfonso Rueda, expresou o seu "respecto" á decisión dos británicos de desligarse da UE tras "tantas idas e voltas", pero insistiu en que trae "tantos problemas" a "moitos países de Europa".
En calquera caso, garantiu que o Goberno galego e o central están "en permanente contacto" co sector pesquerro e suxeriu que "hai moitísimas relacións, tamén económicas, que se teñen que manter".
XACOBEO 2021
Antes da reunión do padroado, Rueda informou de que se fará "especial fincapé na promoción e difusión" do Xacobeo 2021 en Europa, no que tamén a Fundación Galicia Europa "vai seguir sendo un elemento fundamental".
De feito, na reunión deste martes abordáronse as negociacións do marco financeiro europeo plurianual 2021-2027, nos que a Xunta, segundo afirma, "segue traballando" para que Galicia "siga percibindo as axudas que lle corresponden" no próximo período orzamentario.
Respecto diso, Rueda avanzou que seguirán "buscando aliados" como o fixeron previamente para "non baixar de forma importante" as contías que lle corresponden a Galicia desde Europa. Nesta liña, asegurou que "volverán falar" co asturiano para "seguir conseguindo cantidades importantes" que son "tan necesarias".
