Por Europa Press / Redacción | SANTIAGO DE COMPOSTELA | 21/08/2019 | Actualizada ás 18:01
A volta ao cole supón un gasto de 758 euros por alumno para as familias galegas, o que se traduce nun 2,8 por cento dos gastos anuais que se dan nun fogar, segundo publica un estudo realizado por unha web de aforro. En concreto, a plataforma kelisto.es explicou este mércores nun comunicado que a factura da volta ao cole en Galicia rolda os 300 millóns de euros para o curso 2019-2020.
Por outra banda, a comunidade galega sitúase como a terceira rexión de España que menos gasta por alumno ao comezo do curso escolar, só por diante das Illas Canarias e A Rioxa. Con todo, os datos sobre o desembolso familiar anual revelan que Galicia é o oitavo territorio no que o impacto do comezo do curso educativo é maior, co 2,8 por cento do gasto destinado á volta ao cole. Unha posición que comparte con Cantabria, as Illas Baleares, Murcia, Aragón e Andalucía.
A NIVEL NACIONAL
Respecto ao conxunto nacional, o regreso ás aulas custará ás familias 879 euros de media, unha cifra que representa un 2,94 por cento dos 29.871 euros que gasta un fogar ao ano. No entanto, o impacto será moi distinto en función da comunidade autónoma: a peor parada será a Comunitat Valenciana, onde a marca sobre o orzamento familiar será de case un 4 por cento (3,7%).
A continuación situarase Estremadura (3,4%), seguida de Cataluña (3,3%), Castela e León (3,2%), Madrid e Castela-A Mancha (ambas as cun 3,1%). No extremo contrario sitúanse A Rioxa e Navarra, cun 2,3 e 2,7 por cento respectivamente.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.