Alcaldes socialistas rexeitan o "modelo Sogama" para a auga, no que "os concellos pagan e a Xunta decide"

Os alcaldes socialistas da provincia da Coruña mostraron o seu rexeitamento ao "modelo Sogama" para a auga anunciada polo Goberno galego ao considerar que "os concellos pagan e a Xunta decide". Así se pronunciaron despois de que o Consello da Xuna aprobase este xoves a tramitación do anteproxecto de lei polo que se creará unha sociedade pública para a xestión "profesionalizada" do ciclo completo da auga.

Os rexedores piden participar no ciclo integral de xestión da auga e que os investimentos sexan acordados coa Federación gelega de municipios e provincias (Fegamp). En concreto, demandan que "o 50% do que se recada polo canon da auga nun concello se destine a investimentos nese municipio para melloras nas infraestruturas hidráulicas".

Unha trintena de alcaldes dos 41 municipios que goberna o Partido Socialista na provincia participaron este venres en Ponteceso (A Coruña) nunha reunión do Consello de Alcaldes e Alcaldesas.

Neste escenario, o secretario xeral dos socialistas coruñeses e presidente da Deputación, Valentín González Formoso, considerou "xusto" que "unha parte do que recada Augas de Galicia quede nos concellos".

Na reunión de traballo, os alcaldes pediron tamén "integrar no Fondo Galego de Cooperación Local todos os fondos de subvencións a concellos para asegurar a obxectividade na repartición, como fai a Deputación co Plan Único".

Por último, os alcaldes do PSOE solicitan que os concellos poidan utilizar os seus remanentes de tesouraría para investimentos que deriven en creación de emprego e actividade económica.

"O Consello de Alcaldes é un órgano do partido a nivel provincial, somos un partido municipalista e hoxe puxemos en común temas esenciais e prioritarios para os concellos", engadiu.