Unha sentenza ratifica que o exalcalde do PP de Trazo actuou irregularmente
Considera que actuou de forma irregular ao rexeitar sen pasar polo pleno un recurso presentado polo PSOE aos orzamentos municipais de 2018.
Por Europa Press / Redacción | A Coruña | 14/10/2019 | Actualizada ás 19:41
Unha sentenza do Xulgado Contencioso Administrativo número 3 da Coruña ratifica que o exalcalde de Trazo, José Dafonte (PP), actuou de forma irregular ao rexeitar sen pasar polo pleno un recurso presentado polo PSOE aos orzamentos municipais de 2018.
A sentenza estima o recurso contencioso administrativo presentado polos socialistas fronte á resolución do rexedor sobre a inadmisión da reclamación que formularon fronte á aprobación inicial do orzamento municipal para o pasado exercicio.
"Sexa como for, errou o alcalde ao resolver a reclamación, pois non lle correspondía a el tomar esa decisión, senón ao órgano plenario (...) Por tanto, tense que estimar na súa integridade o recurso, o que supón que se anule a resolución do alcalde, así como a presunta desestimatoria, con orde de que o órgano plenario resolva a reclamación nos termos que procedan", argumenta o auto.
En coherencia, o fallo anula a resolución, á vez que ordena ao órgano plenario que resolva a reclamación formulada nos termos que procedan.
Na actualidade o bastón de mando na localidade teno a popular Josefina Suárez.
"PAPELETA COMPLICADA DO PP"
"Cando o señor Dafonte presentou os orzamentos, os socialistas levamos diferentes alegacións que foron rexeitadas; posteriormente, como non estabamos de acordo coas contas, presentamos un recurso ao proxecto", explicou Beatriz Domínguez, portavoz dos socialistas de Trazo.
"A lei é moi clara e reflicte que un recurso deste tipo debe levar a pleno, pero o señor Dafonte decidiu actuar unha vez máis á marxe da legalidade e desestimou o recurso de forma persoal, sen pasar polo pleno", engade.
Ademais de censurar esta forma de actuar "soberbia e prepotente", os socialistas advirten que agora o PP "ten unha papeleta complicada", tendo en conta que "debe acatar a sentenza", pero os orzamentos xa están executados.
"Independentemente das consecuencias que poida ter todo isto, o sucedido demostra unha forma de facer política da que a xente está moi cansa, a xustiza deunos a razón e tócalle ao PP cumprir", retou.
