Arrinca a 'II Feira da Innovación' da USC, que promove a oferta docente e investigadora da institución
Por E.P. | SANTIAGO DE COMPOSTELA | 27/11/2019 | Actualizada ás 20:23
A Cidade da Cultura acolle entre este mércores e o xoves o II edición da 'Feira de Innovación' da Universidade de Santiago de Compostela, un evento que busca promover a oferta docente, de investigación e de servizos da institución académica.
Esta iniciativa conta cun espazo de atención ao estudiantado para resolución de dúbidas e para consultar información sobre as titulacións da universidade e os seus servizos. Así mesmo, inclúe un programa de relatorios divulgativos, exhibicións e demostracións interactivas para achegar exemplos prácticos dos proxectos de investigación nos que traballa a institución.
Entre outras actividades atópase unha exposición de contidos vinculados a proxectos de Aprendizaxe-Servizo e a difusión de accións de voluntariado, así como unha mostra do inventario do Servizo de Publicacións da USC.
O reitor, Antonio López, e a conselleira de Educación, Universidade e Formación Profesional, Carmen Pomar, asistiron durante a mañá deste mércores á inauguración da feira, onde a mandataria educativa destacou a "importante tarefa" destas institucións como "transmisoras de coñecemento e formadoras das xeracións futuras".
Neste sentido, lembrou as iniciativas nas que traballaron desde Educación xunto coas institucións como o Mapa de Titulacións, o Plan de Excelencia ou a procura dun financiamento "estable".
