Varios porcos mortos tras accidentarse en Dozón un camión que os transportaba

Un accidente cun camión que transportaba porcos puxo en alerta aos servizos de emerxencia no concello pontevedrés de Dozón este mediodía, segundo informa o 112.

Ás 14,00 horas, o vehículo de transporte saíuse da vía na EP-6104, á altura da parroquia do Castro, e finalizou envorcado fóra da estrada. A pesar de que o condutor do camión resultou ileso, algúns dos animais quedaron atrapados e non sobreviviron ao impacto.

Co fin de garantir as condicións de seguridade na vía e recuperar aos cochos, ata o lugar dos feitos desprazáronse os Bombeiros do Deza, axentes da Garda Civil de Tráfico e tamén persoal de conservación da estrada.

Algúns porcos soltos tras o accidente dun camión que os transportaba | Fonte: foroanimal.com