Por E.P. | SANTIAGO DE COMPOSTELA | 03/12/2019 | Actualizada ás 18:44
O Tribunal Superior de Xustiza de Galicia (TSXG) confirmou este martes a delimitación da ruta principal do Camiño de Santiago, en concreto o 'Camiño Francés' no límite do aeroporto de Lavacolla, á altura do municipio do Pino. A sala desestimou o recurso interposto contra o decreto do Goberno galego por parte dun particular que negaba que se tratase da ruta orixinal.
O demandante pedía a nulidade do decreto da entón Consellería de Cultura, Educación e Ordenación Universitaria e alegaba que esta decisión vulneraba a normativa internacional, estatal e autonómica e non reflectía a traza "auténtica ou histórica", o que levaría á "desprotección" da ruta tradicional.
Así mesmo, defendía que estas accións deben ser "máis que unha mera sinalización turística", e deben levar tanto unha delimitación física como da súa contorna de protección, e que o criterio para esta determinación debe ser a autenticidade histórica, fundamento do seu valor cultural.
Os maxistrados subliñaron que o demandante "non acredita suficientemente a falta de rigor histórico da delimitación realizada no decreto". "Segue un concepto puramente historicista e estático do Camiño de Santiago, conforme ao cal todo lugar polo que se produciu durante un tempo o paso de quen peregrinaban a Santiago de Compostela ten que ser considerado traza do camiño e recuperada e protexida como tal, aínda que actualmente non poida, en razón do seu estado, utilizarse como lugar de tránsito".
O tribunal incidiu en que o Camiño, "máis que pertencer ao patrimonio de bens materiais, forma parte do patrimonio inmaterial", e representa un elemento " vivo, dinámico e suxeito aos cambios da cultura que o sostén". Por iso, a decisión de Cultura é "motivada e non vulnera a normativa".
RESPECTA OS CRITERIOS HISTÓRICOS
En canto á delimitación efectuada, o fallo confirmou que "respecta os criterios de historicidade e autenticidade, e non deixa desprotexida a traza con vestixios e considerou probado que a identificación do Camiño é "conforme a Dereito, combinando dita delimitación coa adecuada protección dos elementos vinculados ao camiño en desuso".
O tribunal tamén lembra que na lei de protección dos Camiños de Santiago "non se establece de forma precisa a metodoloxía de delimitación a empregar", o cal ocorre "en todas as comunidades autónomas, nin se refire a a necesidade de levala a cabo, exclusivamente, en base a momentos históricos concretos nin a trazas orixinarias, configurando o lexislador o Camiño de forma viva e dinámica".
O TSXG insiste en que as variacións nas rutas do camiño "foron constantes ao longo da historia" e estiveron motivadas "por distintas circunstancias: dar continuidade funcional ao trazado, seguridade, infraestruturas públicas, etc.". "A dificultade de recuperar de forma exacta o trazado dos camiños medievais, salvo en puntos esenciais e moi concretos, habendo de partir, como ocorre neste caso, da motivación das decisións da Administración e a composición do equipo técnico encargado desa tarefa".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.