O xulgado obriga o Sergas a pagar as gardas dunha traballadora durante a baixa de maternidade
Estas remuneracións non lle foran entregadas polos catro períodos de baixa que adquiriu entre o 2015 e o 2017.
- Sergas e sindicatos aproban a convocatoria "inmediata" dunha oposición con 1.057 prazas
- Os hospitais privados pídenlle á Xunta ter "máis protagonismo" na sanidade pública
Por Europa Press / Redacción | SANTIAGO DE COMPOSTELA | 13/12/2019 | Actualizada ás 19:09
O Servizo Galego de Saúde (Sergas) está obrigado a pagar as xornadas de garda dunha das súas traballadoras, que non lle foron remuneradas durante a súa baixa de embarazo, maternidade e lactación.
Así o considerou o xulgado número 4 do Contencioso Administrativo da Coruña, que recoñeceu o dereito desta facultativa a percibir o prorrateo das gardas correspondentes ás baixas que sufriu a consecuencia do seu embarazo.
A Confederación Estatal de Sindicatos Médicos (CESM) explicou este venres nun comunicado que os feitos se remontan ao 18 de xaneiro de 2018, cando a profesional solicitou esta remuneración polos catro períodos de baixa que adquiriu entre o 29 de setembro de 2015 e o 1 de febreiro de 2017.
Naquel momento, o xerente da EOXI da Coruña denegou a solicitude, polo que a afectada interpuxo un recurso que non foi contemplado, senón "desestimado por silencio administrativo". O seguinte paso foi interpor unha demanda contra o Sergas.
No xulgado defendeuse a postura da traballadora en base ao acordo de 1995 entre o Sindicato Médico e a Consellería de Sanidade, que derivou nunha lei de 2017 que, como medida de protección á maternidade, garante a percepción de todas as retribucións básicas, complementarias fixas e a media das variables durante estes períodos.
Ademais, tamén se argumentou que as gardas médicas constitúen unha parte da xornada normal que han de realizar os funcionarios médicos e por este motivo non pode contemplarse como unha "gratificación", senón como unha "retribución ordinaria complementaria".
Por último, a defensa tamén asegura que ningún dos síntomas dun embarazo poden "cualificarse como enfermidade común, como esgrimiu o Sergas para denegar o abono do prorrateo das gardas durante esas baixas".
