Convocada o 8 e 9 de febreiro a OPE con 277 prazas para Enfermaría, Fisioterapia e persoal de servizos
O Diario Oficial de Galicia (DOG) publica este xoves o lugar, data e hora da fase de oposición dos procesos selectivos correspondentes á convocatoria de 2019, que se celebrará no recinto feiral de Silleda.
- Máis de 150 vacantes de Correos en Galicia dispútanse este domingo a través dunhas probas de ingreso
Por Europa Press / Redacción | SANTIAGO DE COMPOSTELA | 23/01/2020 | Actualizada ás 10:54
O Servizo Galego de Saúde (Sergas) fixou para o 8 e 9 de febreiro a Oferta Pública de Emprego (OPE) con 277 prazas de varias categorías de Enfermaría especialista, Fisioterapia e persoal de servizos xerais.
Segundo informou a Consellería de Sanidade nun comunicado, trátase das probas para o acceso a 126 prazas de persoal de servizos xerais, 30 da categoría de Enfermaría Familiar e Comunitaria, 18 de Enfermaría Pediátrica, dúas de Enfermaría do Traballo, 30 de Enfermaría especialista en saúde mental e 71 de Fisioterapia.
O Diario Oficial de Galicia (DOG) publica este xoves o lugar, data e hora da fase de oposición dos procesos selectivos correspondentes á convocatoria de 2019, que se celebrará o fin de semana do 8 e 9 de febreiro no recinto feiral de Silleda.
O Sergas destaca que no caso das categorías de Enfermaría Familiar e Comunitaria, Enfermaría Pediátrica e Enfermaría do Traballo trátase "do primeiro proceso selectivo" convocado polo Servizo Galego de Saúde para estas especialidades.
En total neste proceso foron admitidas 9.276 persoas das cales 7.530 corresponden á categoría de persoal de servizos xerais; 191, á de Enfermaría Familiar e Comunitaria; 187, á de Enfermaría Pediátrica; 54, a Enfermaría do Traballo; 133, a Enfermaría especialista en saúde mental; e 1.181, a fisioterapeuta.
En concreto, o sábado 8 de febreiro en xornada de tarde examinaranse os aspirantes das categorías de persoal de servizos xerais, Enfermaría Pediátrica e Enfermaría Familiar e Comunitaria. Mentres, o domingo 9 en xornada de mañá será a quenda dos aspirantes das categorías de Enfermaría do traballo, Enfermaría de saúde mental e fisioterapeuta.
