Feijóo anuncia en Uruguai que repartirá o Carné Xove tamén entre mozos da diáspora galega

O presidente da Xunta, Alberto Núñez Feijóo, anunciou este venres en Montevideo (Uruguai) que o Carné Xove se estenderá á diáspora galega, que contarán coas "mesmas vantaxes" que os mozos en Galicia, España e Europa. Os beneficiarios deberán ter de 12 a 30 anos, nacionalidade española e veciñanza civil galega.

Así o avanzou durante un encontro celebrado coa colectividade no Centro Galego da capital uruguaia, ao que se referiu como "un exemplo da fraternidade". E é que esta foi a primeira institución deste tipo, un camiño que despois replicaron casas, fogares ou irmandades galegas por toda América, informa a Xunta.

Neste contexto, Feijóo subliñou que o Centro Galego de Montevideo "proxectou e compartiu" en Uruguai a cultura galega, facéndoa máis extensa. "A galeguidade, en definitiva, nace da nosa apertura ao mundo e da solidariedade que abandeiran centros como este", aseverou.

Ademais, o presidente da Xunta reafirmou o compromiso do seu Goberno con converter Galicia nunha "oportunidade" para os mozos do exterior, a través de iniciativas como bolsas de excelencia á mocidade encamiñadas a xerar oportunidades de formación e cuxa convocatoria sairá en próximas semanas cun total de 250 prazas (150 para estudos universitarios e 100 en Formación Profesional).

Feijóo tamén resaltou programas como 'Conecta con Galicia', que en 2019 celebrou o seu 30 aniversario e que fixo posible que máis de 9.000 mozos de 20 países participasen nesta experiencia para fortalecer os seus lazos con Galicia. De feito, o encontro do titular do Executivo galego serviu para entregar a Compostelá aos mozos que participaron neste programa.

Respecto do Centro Galego, Feijóo reivindicou a "plena vixencia" destas institucións, nas que Galicia atopa "sempre" os seus "mellores embaixadores".

O XACOBEO, "UNHA CELEBRACIÓN GLOBAL"

Nesta mesma liña, convocou a todos eles a traballar na difusión do Xacobeo 2021, para converter este evento "nunha celebración global que reforce Galicia como porta de Europa a América e de América a Europa".

"O próximo ano 2021, Galicia ten unha cita co mundo que levamos tempo preparando", dixo, á vez que incidiu en que a Galicia do Ano Santo terá as súas portas "máis abertas que nunca".