Activada a alerta laranxa para este domingo por forte ondada na costa da Coruña
Nas provincias de Lugo e Pontevedra, o aviso será amarelo e os ventos poderán superar o 80 km/h na Mariña
Por E.P. | SANTIAGO DE COMPOSTELA | 08/02/2020 | Actualizada ás 18:29
A Axencia Estatal de Meteoroloxía (Aemet) activou a alerta laranxa por forte ondada a partir do mediodía deste domingo na costa da Coruña. Mentres tanto, a alerta no litoral das provincias de Lugo e Pontevedra será amarela e comezará xa a medianoite.
Esta situación deriva dunha borrasca moi profunda situada ao noroeste de Irlanda, que propiciará unha situación complicada no mar con ondas de entre 5 e 6 metros de alto na Costa da Morte e no noroeste coruñés, e de 4 a 5 metros nas Rías Baixas e na Mariña lucense.
En canto aos ventos, espéranse refachos de máis de 80 quilómetros por hora desde as 9,00 horas do domingo na costa da provincia de Lugo. No mar, os ventos soprarán de compoñente suroeste de forza 7 durante todo o día, podendo alcanzar intervalos de forza 8 na Costa da Morte e nos arredores de Estaca de Bares.
ALERTAS DO LUNS
A xornada do luns tamén comezará con inestabilidade, cunha alerta amarela en todo o litoral por mar de fondo do noroeste con ondas de 4 a 5 metros.
Esta situación, provocada por unha profunda borrasca ao sur de Islandia, agravarase a partir das 6,00 da mañá, cando o aviso pasará a ser de novo de nivel laranxa e as ondas poderán alcanzar os sete metros de alto.
