PSdeG, Galicia en Común e BNG apostan por aprazar as eleccións e fixar unha nova data
O PP quere tamén adiar as eleccións pero sen fixar ningunha data.
Por Europa Press / Redacción | SANTIAGO DE COMPOSTELA | 15/03/2020 | Actualizada ás 21:16
PSdeG, Galicia en Común e BNG concordan na necesidade de aprazar as eleccións ante a grave crise do coronavirus, pero queren que se fixe unha nova data para a súa celebración. Así llelo trasladarán os líderes desta formación ao presidente da Xunta, Alberto Núñez Feijóo, na reunión prevista para este luns.
A través dun comunicado, Gonzalo Caballero apuntou que eses comicios, "como moi tarde", deberían celebrarse antes do 27 de setembro, cando aproximadamente se cumpre o fin da actual lexislatura. Durante ese encontro, Caballero reclamará medidas para "mellorar a protección e condicións" dos profesionais do Servizo Galego de Saúde (Sergas) no actual contexto de crise do coronavirus COVID-19.
Tamén Galicia en Común-Anova Mareas proporá na reunión deste luns que se reactive o "proceso electoral" unha vez superada a crise sanitaria actual "mediante un novo acordo" entre "a mesma mesa de partidos". Así o informou esta candidatura este domingo nun comunicado no que explicou que, ante este "escenario" de estado de alarma, o candidato Antón Gómez-Reino centra a súa atención "nos máis vulnerables e fráxiles" para que non queden atrás, e non nas eleccións.
Hai uns días a líder do BNG, Ana Pontón, tamén se amosaba favorable ao atraso da cita electoral e propuña como data para a súa celebración o mes de xuño. Pola súa banda, o PP e o propio Feijóo queren evitar establecer ningunha data polo momento.
