Por Galicia Confidencial | Santiago de Compostela | 18/03/2020 | Actualizada ás 10:00
O colega Josinho Silva do café-bar o 13 en Compostela, botounos unha man para a primeira das propostas culinarias que vos ofrecemos. Amigos e amigas, velaquí unha sopa de peixe digna dun convento cisterciense (ou como se di, para comer como un cura).
SOPA DE PEIXE
Un prato perfecto para estes días incertos e de pouco consumo calórico.
Ingredientes:
-500g de peixe (pescada,escacho, pinto... .) o q prefiras ou estea mais barato na praza
-500g mexillóns
-250g berberechos
-Un par de luras grandes
-1pemento vermello
-1pemento verde
-2 cebolas
-1 alloporro
-2 dentes de allo
-Sal, pementa e pementón
Fumet: ferver durante uns dez minutos os restos das hortalizas e do peixe.
1 abrir os mexillóns e berberechos ao vapor. Reservar a auga e as viandas.
2 picar e sofritir as hortalizas uns 20 minutos.
3 engadir as luras limpas e picadas en anacos pequenos uns10 minutos.
4 cullerada de pementón (mellor doce se prefires picante sen problema).
5 meter o peixe totalmente desespiñado e sen escamas.
6 engadir coa axuda dun coador o fumet e a auga dos mexillóns e berberechos.
7 deixar ferver a lume medio uns dez min, sal e pementa segundo o gusto.
Pódese acompañar cunhas costras de pan fritido ou tortado.
BERENXENAS RECHEAS
Como non podía ser doutra maneira en Galicia Confidencial tamén nos animamos a darlle con gusto á arte da boa mesa. Así ofrecemos a seguinte receita, un tanto persoal, de berenxenas recheas.
-Unha ou dúas berenxenas (segundo as necesidades ou número de xente a comer)
-Xamón cocido ou peituga de pavo (a cantidade a elixir)
-Queixo para fundir (non hai que ir ao máis caro, pode ser mesmo o dos sandwiches que os hai ben baratos)
-Un ou dous tomates
-Especias (a elixir tamén)
-Aceite de oliva
Lavamos e cortamos as berenxenas en horizontal creando láminas. Pasámoslles polas dúas caras aceite de oliva e logo condimentamos coas especias. Facemos uns rolos co queixo e coa peituga de pavo, recomendamos a peituga de pavo ou xamón cocido envoltos no queixo (pode ser ao revés se se quere). Cortamos o tomate en láminas finas, botámoslle aceite e especias.
Collemos a bandexa do forno e imos poñendo as pezas de berenxena. Entre as láminas de berenxena colocamos as pezas de tomate e entre as pezas de tomate os rolos de queixo e peituga de pavo, así ata que enchamos toda a berenxena. Deixamos toda esta peza deitada sobre un lado, esquerda ou dereita, porque non se ten en pé. Se se quere, pódese botar por encima queixo raiado ou aceite de oliva. Metemos no forno e programamos para uns 20 minutos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.