O PPdeG volve gañar na emigración
Hai unha redución da participación do 60%. Os populares acadan a a metade dos votos e AGE sitúase como terceira forza tamén no exterior. O PP e PSOE poderían pactar unha nova reforma da lei electoral para incentivar a participación dos emgirantes.
Por Galicia Confidencial | Compostela | 29/10/2012 | Actualizada ás 17:33
O PPdeG volveu ser o partido máis votado na emigración. En Ourense e Pontevedra foi o partido máis votado, acadando mesmo porcentaxes superiores ao 50% da participación. Con todo, nestes comicios a participación dos residentes ausentes baixou un 60% con respecto a hai catro anos, froito, principalmente, da reforma da Lei Electoral para incluir o voto rogado.
Nos anteriores comicios galegos, en marzo de 2009, a emigración emitiu 96.257 votos válidos, o que se traduciu nunha participación do 28,7%. Nestas non chegaron aos 13.000, o 3,25%. Tampouco en ningunha das eleccións celebradas en España despois da introdución do voto rogado, a participación da diáspora chegou nin sequera ao 10%. Nos últimos comicios en Andalucía, votou o 7,1 por cento, e en Asturias, tocouse fondo cunha participación de só o 3,3 por cento dos residentes no exterior aunque o seu voto foi determinante para mudar o actual goberno.
Anova, terceira forza
Case a metade dos 12.954 votantes da diáspora (un 49,2 por cento) apoiaron ao PPdeG cun total de 6.374 sufraxios. O PSdeG logrou no catro provincias galegas un total de 3.870 votos, mentres que a coalición Alternativa Galega de Esquerda (AGE), obtivo 617 sufraxios. Séguelle o BNG, con 603 sufraxios.
O PP conseguiu ametade dos sufraxios no catro provincias galegas, mentres que o PSOE sitúase como a segunda forza máis apoiada tamén en todas as circunscricións. En terceiro posto varía en función do territorio. Así, por exemplo, o BNG lógrao en Lugo e AGE conségueo en Pontevedra e A Coruña. En Ourense, Sociedade Civil e Democracia (SCD), formación liderada por Mario Conde, foi o terceiro.
Cambios na lei
Por iso, tanto PP e PSOE abordarán nos próximos meses unha nova reforma da lei electoral co fin de aumentar a participación dos españois residentes no estranxeiro nos comicios xerais e autonómicos, despois da baixada da participación no exterior.
A obrigación dos censados no exterior de comunicar persoalmente a súa vontade de exercer o sufraxio como paso previo a recibir as papeletas foi unha medida que se incorporou á lei a comezos do 2011 para garantir a identidade do elector e evitar manipulacións.
Tanto socialistas como populares apoiaron a reforma pero, logo das últimas eleccións, poderían introducir novas modificacións para incentivar o voto dos emigrantes.
Nas eleccións autonómicas celebradas en maio do pasado ano e nas xerais do 20 de novembro, pediron votar un 10 por cento, pero só a metade lograron remitir a tempo a papeleta, debido ao axustado dos prazos e aos atrasos na recepción da documentación.
O papel dos emigrantes
E é que o censo de Residentes Ausentes incrementouse un 18% desde o ano 2009. No exterior hai 396.473 emigrantes, un 15% dos case 2,7 millóns de galegos. Por provincias, A Coruña é a que ten máis emigrantes con dereito a voto (137.477) seguida de Pontevedra (114.383), Ourense (88.620) e Lugo (55.993).
O papel da diáspora en Galicia foi clave durante os gobernos de Manuel Fraga. En 1997, Manuel Fraga conseguiu un deputado máis pola Coruña en detrimento do BNG tras o reconto do voto da emigración. En 2005, en cambio, o PP estivo a punto de rabuñar un deputado por Pontevedra co que evitaría o goberno bipartibo. Nas autonómicas do 2009 o voto emigrante tamén variou a repartición de asentos en Ou Hórreo aínda que non o resultado. O PP perdeu un deputado en Ourense en favor do PSOE, pero mantivo a maioría absoluta con 38 parlamentarios.
