A norma de Culleredo: os portais pares pasearán a nenos en horas pares e por beirarrúas pares

O Concello de Culleredo (A Coruña) ultima un borrador de bando de alcaldía cunha serie de recomendacións para regular os paseos con nenos no estado de alarma que decretará o Goberno a partir do domingo.

Segundo informa, o obxectivo co mesmo é "racionalizar as medidas" e evitar no posible "aglomeracións nos paseos, que serian contraproducentes para a imprescindible distancia social que as autoridades sanitarias reclaman".

Respecto diso, o alcalde de Culleredo, José Ramón Rioboo, considera oportuno lograr "un equilibrio" nestas saídas na zona urbana "cunhas recomendacións que sirvan de guía á cidadanía" e para que "se pode incrementar a seguridade para as familias que decidan saír á rúa cos pequenos".

Neste sentido, avanza que se apostará por estruturar as saídas por números de portal e horas pares e impares. Desta forma, os residentes en portais pares sairían no intervalo de horas pares e os dos impares farían o propio coas horas impares.

Dentro de cada quenda, á súa vez, dividirase en dous grupos en función do número de portal "para que uns empreguen a beirarrúa do seu portal e outros a de en fronte e así distribuír mellor o espazo". "Por exemplo, no caso dos pares cuxo portal termine en 0, 2 e 4 pasearán preferentemente pola beirarrúa dos pares e os que terminan en 6 e 8, pola dos impares", avanza.

Así mesmo, o Consistorio prevé que os paseos se realicen nas contornas próximas "buscando espazos libres e abertos por un tempo prudencial, evitando o acceso a establecementos e, en ningún caso, para realizar visitas a outros domicilios". Por outra banda, lembra que se manterá a prohibición de acceso a parques infantís e espazos deportivos.

FESTIVAL

Por outra banda, a Asociación Cultural Festival Intercentros anunciou a cancelación da súa gala solidaria na Coruña e a devolución das entradas ante o contexto de crise sanitaria provocado pola COVID-19.

Nun comunicado, asegura que, "en diálogo co Concello da Coruña", adoptou a medida de cancelar unha nova edición cuxa recadación estaba prevista destinar a Aspace e Cáritas. Inicialmente, estaba prevista para o 28 de marzo, pero quedou, ata esta decisión, aprazada ata nova data.