Os sindicatos ven "prematura" a volta ás aulas e piden á Xunta "non botar balóns fóra"

A decisión da Consellería de Educación, Universidade e Formación Profesional de permitir un regreso parcial do alumnado durante a desescalada suscitou a preocupación do profesorado, que considera que os centros non están preparados para asumir unha especie de 'simulacro' de inicio do curso.

É por iso que solicitaron, en declaracións a Europa Press, a convocatoria dun encontro ou da mesa sectorial do ramo para abordar as cuestións que afectan á organización, os procedementos a seguir e sobre todo ás implicacións en materia de prevención de riscos, tendo en conta que dous destes sindicatos xa presentaron denuncia na Inspección de Traballo.

Suso Bermello, de CIG-Ensino, instou a Consellería a "abandonar o deixamento na que está instalada" e que traballe para preparar todas as medidas necesarias antes da incorporación do profesorado e os alumnos.

"Non valen recomendacións. Ten que haber un protocolo legal, publicado no DOG e negociado coas organizacións sindicais", advertiu, para avanzar que a CIG tomará "as medidas oportunas de carácter legal" para tentar impedir calquera incorporación "sen existir esas garantías" de seguridade e saúde.

Aínda que estas organizacións están a favor de permitir o reforzo para o alumnado que se presentará á selectividade, si cren conveniente a necesidade de reforzar e reestruturar o persoal docente, ademais de eximir os grupos de risco.

Desde CC.OO. Ensino insistiu na importancia de analizar e avaliar os riscos de cada posto de traballo e de elaborar protocolos específicos ante a COVID-19, unha cuestión que "se eludiu" por parte da Xunta amparándose nas instrucións do Ministerio de Educación.

"Os protocolos non son intercambiables pola situación específica de cada centro", considera, e esixe "instrucións claras" para sacar adiante estas xornadas lectivas presenciais e voluntarias. Advirte tamén que "non se dubidará en denunciar ante a autoridade laboral pertinente" calquera situación "que poña en risco a saúde" tanto dos traballadores como do alumnado.

CONTRA "EXPERIMENTOS"

Julio Díaz, de ANPE Galicia, pediu que se deixe de "botar balóns fóra", posto que os centros están "moi pillados de tempo" mentres se toman medidas "á esculca do gran de millo". Para Díaz, o obxectivo debería ser enfocarse no curso que vén, para poder arrincar en condicións e que non debe pasar por unha "educación de dúas velocidades" debido á falta de recursos das familias.

"Facer experimentos a final de curso non vai ser bo", apuntou, para lembrar que lle Organización Mundial da Saúde xa está a advertir do "repunte importante" de casos da pandemia, o que obriga a preparar debidamente o sistema. "É excesivamente prematuro", reiterou, para advertir que o comité de Saúde Laboral non tivo "nin un só contacto" de Educación para estudar as medidas necesarias.

Paula Carreiro, de FeSP-UGT, considerou que "non debería ir ningunha etapa educativa aos centros" neste momento, e reprochou que a Consellería lanzase "ao aire" a súa proposta, sen negociar cos representantes do profesorado, a pesar de reunirse o día anterior.

Ademais das cuestións de prevención de riscos, aínda se descoñece o alumnado por aula, o profesorado que terá que acudir, e a metodoloxía para poder compatibilizar esta reincorporación coa teledocencia. "Pode implicar unha carga moi importante para o profesorado e teñen que delimitar ben a forma na que van facer as cousas", sinalou, ademais de todo o relativo aos dereitos de conciliación.

As FAMILIAS, "ESQUECIDAS"

Outra das partes importantes deste debate fórmana as familias, e máis en concreto as confederacións de ANPA, que se consideran "as grandes esquecidas" polas administracións públicas.

Rogelio Carballo, da Confederación Galega de ANPA de Centros Públicos, manifestou as súas dúbidas sobre a asistencia voluntaria, e lamentou que o Goberno sexa "incapaz" de concretar unha "directriz explícita", o que provoca "unha inseguridade tremenda" e que "non se pode deixar ao arbitrio".

Sobre todo, insistiu en que a falta dun protocolo sanitario específico para o sistema educativo revela que a parte "máis esquecida é a familia", e esta situación "non se pode manter indefinidamente", coa mirada posta en setembro.

Estudantes examinándose.. UNIVERSIDADE DE SEVILLA - Arquivo | Fonte: Europa Press