A Xunta fala agora de compatibilizar a actividade económica coa protección do medio ambiente e a seguridade laboral

O conselleiro de Economía, Emprego e Industria, Francisco Conde, destacou que para a Xunta é imprescindible redobrar a aposta industrial compatibilizando a actividade económica coa protección do medio ambiente e a seguridade laboral.

Así se pronunciou o titular de Economía durante un encontro telemático con representantes da Alianza pola Competitividade da Industria, no que considerou necesarias medidas que consoliden o tecido galego para poder seguir crecendo e desenvolver unha economía sustentable, baseada na industria e compatible co medio ambiente.

Diso informou a Xunta nun comunicado remitido aos medios, no que explica que a alianza representa sete sectores estratéxicos do tecido industrial español. Trátase da automoción, alimentación, industria química e petrolífera, construción, siderurgia e industria do papel e cartón; e representan 2,9 millóns de empregos e 280.000 millóns de euros en vendas.

Deste xeito, na súa intervención, Francisco Conde destacou o valor engadido, a capacidade exportadora e de investimento en I+D+i que fai que a industria vaia a xogar un papel tractor na recuperación económica.

Por iso, avogou por redobrar a aposta polo sector industrial, estimulando a demanda --con plans renove ou incentivos á mobilidade eléctrica no caso da automoción, impulsando a construción a través da obra pública ou con campañas promocionais no comercio e hostalaría--; reducindo os custos enerxéticos cun estatuto para os consumidores enerxéticos cun estatuto electrointensivo; potenciando a dixitalización; promovendo as exportacións e o acceso a novos mercados; incrementando a eficiencia da cadea loxística e da distribución; adoptando novas medidas financeiras e velando pola prevención nos centros de traballo.

Neste sentido, Conde insistiu en que o sector industrial necesita certidumbres e confianza tanto no plano laboral, como económico, produtivo e da seguridade laboral.

VIXILANCIA ANTIINCENCIOS

O director xeral de Defensa do Monte, Tomás Fernández Couto, presidiu este mércores a reunión do Comité de Coordinación Policial Antiincendios, formado por representantes das diferentes forzas e corpos de seguridade do Estado presentes en Galicia, ademais da propia Xunta.

O encontro serviu para "ultimar os detalles" da vixilancia, disuasión e control da actividade delituosa incendiaria con vistas ao comezo da tempada de risco alto de incendios, destacou a Xunta.

Así, como adoita ser habitual nestas datas, estableceuse unha distribución dos diferentes efectivos sobre o territorio, prestando especial atención a aquelas áreas con maior incidencia deste tipo de actuacións.

No marco deste comité, o director xeral insistiu na importancia da colaboración cidadá na loita contra a intencionalidade incendiaria. Neste sentido, lembrou que a Xunta ten a disposición da cidadanía o número de teléfono gratuíto 085, ao que deben chamar en caso de detectar algún lume forestal. Ademais, existe un teléfono anónimo e gratuíto para denunciar calquera actividade delituosa incendiaria da que se teña sospeita ou coñecemento, o 900 815 085.