O’ Dezaseis, máis preocupado por xerar confianza que polo aforo

A restauración intenta volver á normalidade, e pouco a pouco empezan a abrir restaurantes, iso si, con cautela e tras unha nova planificación obrigada pola Covid19. O Dezaseis atópase nesta situación, aínda está pechado e ten nun ERTE a 18 traballadores, pero anuncia a súa reapertura para o 3 de xuño recuperando a 9 ou 10 deles. A volta non estará exenta de cambios, segundo nos conta un dos socios, Avelino Martínez. “Houbo que facer reestruturación do mobiliario, reducir mesas, acondicionar vestiarios, pintar, redistribuír salas, colocar dispensadores de xeles hidroalcóholicos...”. E non quedan aquí os traballos de preparación para a volta, “tamén houbo que formar aos traballadores nos protocolos de seguridade, facer aprovisionamento de mercadoría e antes de abrir facer unha limpeza xeral a fondo”, engade Avelino.

Cumprindo a normativa da desescalada, o aforo do restaurante quedará en 50-55 persoas e terán que prescindir da pequena barra que había no interior e que facía as veces de ‘recepción de clientes’. Este último aspecto será un pequeno inconveniente porque impedirá as esperas curtas a ter mesa dispoñible dentro do propio local. Agora haberá que afinar a puntualidade ou esperar fóra.

“Estas cartas irán ao baúl dos recordos, de momento van para o faio e despois xa se verá”

Outro cambio importante será que a carta a disposición do cliente. Será máis curta e desaparecerá o mítico ‘formato enxebre’ de madeira, ou como lle chama Avelino “a táboa dos dez mandamentos”. “Estas cartas irán ao baúl dos recordos, de momento van para o faio e despois xa se verá”, dinos con retranca o noso interlocutor. Agora a carta será de papel dun só uso e tamén se ofrecerá un código QR aos clientes para poder escanealo co seu móbil. Reduciranse os pratos da carta e as referencias de viño e sobremesas, manténdose o menú como antes entre semana.

Nesta “nova normalidade” do Dezaseis tamén cambiará a recepción de mercadorías, “queremos evitar o goteo de recepción de mercadorías cada día e reducirémola a dous días á semana, faremos pedidos máis grandes”, comenta Avelino. Esta estratexia loxística facilitará os tempos de control de chegada do produto, simplificará o traballo en cociña e contribuirá á rotación de pratos e frescura do produto.

“Faremos reservas como sempre e non imos apurar a ninguén, non imos presionar á xente para axustar tempos de comidas”

Vendo reducido o aforo preguntamos como afectará isto á xestión de reservas e aos tempos de estancia á hora das comidas. A xerencia teno claro “faremos reservas como sempre e non imos apurar a ninguén, non imos presionar á xente para axustar tempos de comidas”, engadindo “o que si miraremos é facer unha xestión máis escalada da entrada, pediremos ser puntuais pero unha vez na mesa, que o cliente se sinta cómodo e que bote o tempo que necesite”.

Na conversación sae tamén o tema de ofrecer o servizo de comida para levar como liña de negocio, dada a situación actual e visto tamén incluso como tendencia. Avelino confirma que é unha opción que está case decidida, “o que non queremos é precipitarnos demasiado, pero si, a idea é ofrecer comida para recoller no restaurante. Temos que elaborar unha carta especial e valorar que pratos poden formar parte dela sen que merme a súa presenza e calidade”.

Por pechar a conversa, este socio do emblemático restaurante compostelán insiste en que “o primeiro é que os clientes se sintan seguros, xerar confianza, despois xa iremos recuperando aforo pouco a pouco, e sempre mantendo o xeito de facer na cociña e no trato ao cliente que nos caracteriza”.