CxG considera un "insulto" a proposta de fronte común de En Común a PSOE e BNG

O secretario xeral de Compromiso por Galicia (CxG), Juan Carlos Piñeiro Docampo, replicou a Galicia en Común que "non conte" coa coalición Marea Galeguista para "facer política co único obxectivo de botar a Feijóo".

Unha semana despois de que o candidato de Galicia En Común-Anova Mareas, Antón Gómez-Reino, lanzase unha proposta a PSOE e BNG de facer unha fronte común para visualizar unha alternativa ao PPdeG de Alberto Núñez Feijóo nas eleccións do 12 de xullo, Compromiso agradeceu ao líder de Podemos Galicia que non incluíse na proposición a Marea Galeguista, coalición na que participa a organización que encabeza Piñeiro Docampo.

"Agradecemos que non conte con Marea Galeguista, xa que a nós o que nos preocupa é facer política para a xente de Galicia, non contra ninguén", sinalou Piñeiro Docampo, segundo recolle un comunicado remitido aos medios este martes.

"Este tipo de propostas buscan repercusión, pero son un insulto á liberdade de voto dos galegos e galegas, e mesmo un descrédito á figura da Presidencia de Galicia, que recae en quen elixen os votantes", apuntou o secretario xeral de CxG.

Piñeiro Docampo (dereita) Villamayor (esquerda)