Trinta centros de FP acadaron premios para o desenvolvemento de proxectos innovadores

A Consellería de Educación, Universidade e Formación Profesional recoñeceu o traballo de 30 centros cos premios para o desenvolvemento de proxectos de innovación tecnolóxica ou científica e proxectos de innovación didáctica no ámbito da FP.

Nun comunicado, o departamento que dirixe Carmen Pomar explicou que o obxectivo destes galardóns, que teñen unha dotación económica de 800.000 euros, é potenciar as iniciativas innovadoras, o traballo colaborativo e a transferencia de coñecemento entre centros educativos, empresas e outras entidades, buscando a calidade e a excelencia na formación profesional, así como o fomento do emprendimiento.

O departamento educativo destacou que aposta por transformar os ciclos en ensinos que se adapten á contorna produtiva e ao novo modelo económico baseado no coñecemento como forza impulsora. Así, camiña cara a un sistema de formación profesional máis áxil, flexible e eficiente, estreitamente vinculado ás demandas formativas da poboación e ao impulso de valores como a creatividade, a innovación e o traballo en equipo, así como á estimulación do espírito emprendedor.

A convocatoria segue as directrices marcadas pola Estratexia Europa 2020, que incorpora como obxectivo o impulso dunha formación profesional que propicie novas experiencias nos campos da innovación, da calidade, da creatividade e do emprendimiento.

MODALIDADE A

Os proxectos puideron presentarse a dúas modalidades. A primeira delas, de Innovación tecnolóxica ou científica, diríxese ás iniciativas que teñan como obxectivo a xeración de innovación que redunde na mellora de procesos de produción ou de prestación de servizos e que estean orientadas a impulsar a transferencia tecnolóxica entre os centros educativos e a contorna produtiva.

Ademais, estes proxectos deben ter unha incidencia significativa na futura inserción laboral do alumnado e a súa empregabilidade, favorecendo a aparición de oportunidades laborais e iniciativas empresariais.

Nesta categoría resultaron galardoados os seguintes centros: IES Universidade Laboral, en Culleredo; CIFP Ferrolterra, en Ferrol; CIFP Politécnico e IES San Clemente, ambos en Santiago; CIPF Someso, na Coruña; IES Fraga do Eume, en Pontedeume; IES Félix Muriel, en Riaxo; CIFP Politécnico e CIFP As Mercedes, ambos en Lugo; CIFP A Farixa, en Ourense; IES de Vilamarín; IES Plurilingüe Antón Losada Diéguez, na Estrada; IES Montecelo, en Pontevedra; CIFP A Granxa Proxecto Fénix, en Ponteareas; IES Politécnico, CIFP Manuel Antonio, CIFP Valentín Paz Andrade e IES Ricardo Mella, todo eles en Vigo; IES Fermín Bouza Brey, en Vilagarcía; así como CIFP Carlos Oroza de Pontevedra.

MODALIDADE B

A segunda modalidade, de Innovación Didáctica, céntrase nas iniciativas que teñen como obxectivo a creación de materiais ou recursos didácticos que supoñan unha clara innovación nalgunha das familias profesionais.

Estarán orientadas á introdución e á aprendizaxe de novos contidos, tecnoloxías avanzadas, e instrumental ou maquinaria na aula ou no taller, potenciando o deseño de materiais didácticos, deseño de prototipos ou simuladores, laboratorios para prácticas ou maquetas, aplicacións informáticas, etc. Ademais, eses materiais deben ser facilmente trasladables a outros centros nos que se impartan os ensinos para as que foron deseñados.

Nesta modalidade resultaron galardoados os seguintes centros e proxectos: IES Monte Neme, en Carballo; IES Fernando Blanco, en Cee; IES Universidade Laboral, en Culleredo; CIFP Ferrolterra, en Ferrol; CIFP Coroso, en Ribeira; CIFP Politécnico, en Santiago; CIFP Ánxel Casal, na Coruña: IES de Fene, en Fene; CIFP As Mercedes, en Lugo; IES María Sarmiento, en Viveiro; IES a Pinguela, en Monforte; CIFP A Carballeira-Marcos Valcárcel, en Ourense; IES Politécnico e CIPF Valentín Paz Andrade, en Vigo; IES Pedra da Auga, en Ponteareas; IES Chan do Monte, en Marín; CIFP Carlos Oroza, en Pontevedra.

Traballadores autónomos