Os prezos proseguen a súa caída en maio en Galicia
Transporte e vivenda protagonizan o descenso.
Por Europa Press / Redacción | SANTIAGO DE COMPOSTELA | 12/06/2020 | Actualizada ás 11:01
O Índice de Prezos de Consumo (IPC) en Galicia repuntou unha décima en maio en Galicia en comparación co mes anterior, pero a taxa interanual segue en negativo e aumenta a súa caída ata o 1,2%, segundo os datos que publica este venres o Instituto Nacional de Estatística (INE).
A caída interanual segue agrandándose en maio (-1,2%) en Galicia en comparación con abril (-0,9%). Ademais, o retroceso é tres décimas máis acusado que o do Estado (-0,9%).
En España, a caída do IPC foi inferior á esperada, pois o indicador adiantado a finais de maio previra un retroceso de tres décimas, ata o -1%. Tanto a nivel estatal como en Galicia, os prezos encadean dous meses en taxas negativas.
No tocante á taxa interanual, as cifras negativas do IPC explícanse polo intenso descenso en transportes (-8,8%) e vivenda (-7,9%), mentres alimentos (+3,6%) e hoteis, cafés e restaurantes (+2,6%) son os que rexistran maiores crecementos. O avance da taxa mensual dun 0,1% en Galicia ten ao vestido e calzado á cabeza (+2,6%).
No que vai de ano, entre xaneiro e maio, os prezos acumulan un retroceso en Galicia do -1,5%, segundo estes datos do INE.
O INE lembrou que en maio proseguiu o estado de alarma e, aínda que moitos establecementos empezaron a abrir as súas portas, fixérono con limitacións de aforamento. Por iso, a recollida dos prezos tívose que realizar integramente por métodos telemáticos. Parte da cesta de produtos do IPC segue sen estar dispoñible para os fogares, polo que o INE, seguindo as pautas de Eurostat, tivo que estimar o 18,6% dos prezos.
Debido á situación de confinamento dos fogares pola Covid-19, o INE elaborou dúas agregacións especiais nas que se recolle o efecto nos prezos dos bens e servizos que a maioría dos fogares seguiron consumindo na situación actual.
SÓ CANARIAS PRESENTA UNHA TAXA POSITIVA
A taxa anual do IPC baixou en maio en todas as comunidades autónomas en relación a abril, salvo en Canarias, onde se mantivo no 0,4%, sendo ademais a única rexión cunha taxa anual positiva. Os maiores descensos, de catro décimas, corresponderon a Asturias e Cantabria e os menores, a Aragón e Estremadura, cun descenso dunha décima en ambos os casos.
As rexións con maiores taxas negativas ao finalizar maio eran Castela-A Mancha e Castela e León (-1,4% en ambos os casos) e Asturias, Navarra e Aragón (-1,3%), mentres que as taxas negativas menos pronunciadas rexistrábanas Madrid e País Vasco (-0,7%).
