Primeira gran protesta contra o trato "indigno e inhumano" e a xestión da Xunta nas residencias de anciáns

Centenares de persoas protestan polas mortes en residencias e reclaman un sistema 100% público. "Moitos morreron sen poder sequera estar cos seus familiares", lembran.

Por Europa Press / Redacción | SANTIAGO DE COMPOSTELA | 24/06/2020 | Actualizada ás 13:37

Comparte esta noticia

Centenares de persoas reuníronse este mércores en Santiago de Compostela nunha manifestación en protesta polas mortes ocorridas a causa do coronavirus en residencias de maiores e para reclamar un sistema "cento por cento público" de atención á terceira idade.

A marcha, convocada polo Movemento Galego en Defensa das Pensións Públicas (Modepén), as Traballadoras das Residencias (TReGa) e asociacións de familiares de usuarios de residencias como Vellez Digna, estivo apoiada polo PSdeG, o BNG, Galicia en Común-Anova Mareas e Marea Galeguista, entre outros grupos.

A manifestación saíu baixo a lema 'Por uns servizos sociais 100% públicos, universais e de calidade' na capital galega e é a culminación dunha serie de protestas organizadas en días anteriores co mesmo motivo. O secretario de Modepén, Gonzalo Balo, explicou aos medios antes de saír desde a Alameda que o obxectivo das mobilizacións é lograr que os partidos políticos que concorren ás eleccións autonómicas do 12 de xullo leven nos seus programas unha defensa das residencias públicas.

Balo destacou que o motivo destas marchas é "o que ocorreu nas residencias, as mortes que se produciron, a falta de atención ás persoas maiores". "Pedimos unhas residencias públicas ao cento por cento e con atención suficiente, con atención médica e aos pacientes", expuxo.

Os participantes na protesta, que se axudaron de varas para manter as distancias, arrincaron a marcha pouco despois do mediodía, coreando consignas como "Goberne quen goberne, o público se defende" ou "Feijóo, escoita, o pobo está en loita".

Os maiores, insistiu Balo, recibiron durante a crise sanitaria por mor da COVID-19 un trato "indigno e totalmente inhumano". Fixo fincapé na dor tanto dos pacientes que morreron "sen poder sequera estar cos seus familiares" como dos seus achegados.

APOIO POLÍTICO

Os representantes das formacións políticas que apoiaron a protesta coincidiron na defensa dos servizos públicos. A secretaria de Política Social do PSdeG e cabeza de lista por Ourense, Mariña Ortega, manifestou que para os socialistas é "prioritario" o benestar dos maiores, tanto a través das pensións como coa "dignidade" na atención dos que están en residencias.

"Hai outra Galicia para os nosos maiores", afirmou e asegurou que, se hai un cambio de Goberno a partir das eleccións do 12 de xullo, reverterán os "recortes en benestar e dependencia" e a situación nas residencias, cuxo "proceso de privatización" nos 11 anos de goberno de Feijóo "denigró" aos anciáns galegos.

PRIVATIZACIÓN DAS RESIDENCIAS

Pola súa banda, a deputada do BNG e candidata por Pontevedra da formación, Montse Prado, criticou que nos últimos 11 anos non se creou "nin unha soa praza pública" nas residencias de maiores galegas e que este servizo sufriu unha "deterioración" que se puxo en evidencia coa crise sanitaria. Así, chamou á mobilización nas urnas para "terminar co modelo do PP de privatización e mercantilización" e defendeu un servizo integramente público.

O candidato de Galicia en Común-Anova Mareas, Antón Gómez-Reino, censurou que o PP "destruíu sistematicamente os servizos públicos de calidade" e pediu que a cita electoral do 12 de xullo sexa "un xuízo popular ás políticas de destrución do público, corrupción e privatización" de Feijóo, a quen cualificou de "prestidigitador da mentira".

Tamén estivo a dar o seu apoio á marcha o líder da candidatura de Marea Galeguista, Pancho Casal, quen considerou "imprescindible devolver ao público" os servizos relacionados cos coidados, porque "non poden ser un negocio". Ademais, volveu reclamar ao presidente da Xunta que explique ás familias dos usuarios de centros de día por que seguen pechados, a pesar de que se recuperou a actividade económica e social.

Manifestación servizos  públicos 24 xuño 2020
Manifestación servizos públicos 24 xuño 2020

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta