Rebaixas dos fondos de libros de A Nosa Terra
O Consorcio Editorial Galego organiza un 'outlet' de volumes da defunta editorial a prezos 2 libros por 5 euros ou 5 por 10 euros. Parte dos fondos irán para cubrir as débedas que aínda mantén ANT cos seus ex-traballadores.
Por GC Tendencias | Santiago | 01/02/2013 | Actualizada ás 13:04
Do 1 ó 17 de febreiro, o Centro Comercial Area Central de Santiago acollerá un grande ‘outlet’ do libro. É un evento organizado polo Consorcio Editorial Galego e que contará cunha ampla exposición de libros á venda con prezos de liquidación, ademais de moitas e variadas actividades paralelas dirixidas aos visitantes máis pequenos.
Haberá un gran posto de venda de libros descatalogados de diferentes editoriais. En moitos casos serán títulos de libros dificilmente localizables nas canles habituais de venda ou primeiras edicións.
Moitos deses fondos proveñen da liquidación d'A Nosa Terra. A venda deses libros servirá para sufragar parte da débeda que a empresa da Construtora San José deixou a algúns dos seus traballadores.
Segundo Cultura Galega, os libros poranse á venda en lotes de 2 libros por 5 euros, 5 por 10 euros, e prezos de 5, 10 e 15 euros.
Ademais do espazo de venda, todos os sábados haberá, a partir das 7 da tarde, actividades para os máis pequenos a cargo de Xandobela, que se encargará do obradoiro «Trebellos e outros contos».
